Qafar Rakakayak Samara Magaalal Leeda Qokolih Soolo Gexsen
Tama Aracal rakaakayak naharsi saqal massakaxxale Cajji Awwal Qarba leeda messoynah uddur tekkeh taniimik mangoomih adda fakoot abeeh
Xer udduuruh itooiyal demokraasih doolat xissimtuh mango Itiyoppiyah ayyuntittek naharat qafar ummattah esserok sugtem kassiiseeh
Demokraasih migaqle doolat xissimtem takkay immay aggaar migaqluk malak tutu angale sinni maray aracal qambaalaah mari akah madaqak sugnem kassiiseeh
Takkay immay qafar ummattah essero edde daabimteeh malissaah malisittaah inkigid akkiyal xissimte doolatiin edde xissiimem leedah udduur kinnim yubluuse
Asaaku qafar ummatta isih is xiinissaah fanteena doolatat madaqtaah madqisak isim isih koborak isi gaddat isih antifiquk marak qambalta madqa kee makko alle waytam yiysixxige
Marin gabat sugte qafar gaddittek asaaku marin gabat tu matanay gubaay dagah Qafar isim isi gabat lem yiysixxige
Ayfaf caddol qafar ummatta mango biroora akah meekitak mango taqabiik lakal agdube raxxe caagid inki fanteenal inki saaqatat akah aban innah koora inki fanteena biiroh xisak taqabekkal inki fanteenal affaafuk geytimaanam yubluuseeh
Qafar Aggaarah akak sugtem dubuh siyaasa hinnay madduuruk edde aggaarah sugteeh wohuuk ugutak buqre edde takke maxaberiyaak xabba haanam ni Rakaakay afto edde luk masuginnaay away siyaasa hinnay madduuruk Qafar isi afto luk geytimta yiysixxige
Koraan ayfaf kaadu Rakaakay caddol 54% daga gufusaanam xiiqimtem yiysixxige
Tonnah barittooy leey qaafiyataay saqi gaddaay maqaadiniiy kalah tan mangoomul qafar duma edde sugte ceelok mangoomul dadalak temeetem kee tah edde tekkem inkih leedah uddur kinnim yiysixxige
Ellecabol qafar ummatta isil taysem kee gactam tittak baxissa ummatta kinnim ablaasuk qimbime dadal arac xaguuy ayyunti leedat yaffaafuuy baaxo gaddi le ayyuntah yakkuuy qafar ummattah migaq baaxooy baadal inkih maadeh yan caddook bisoh iyyuh qafar ayyunti leeda missoyna Doraanam faxximtaamih farmo taruse.
Kalifa Kadir