Agat Caddol 7heele Adda Gexsitak Sugte Dooro Saay Kee Salaamay, Ximokraasi Kee Muxxule Ummatta Gabah Assagollal Tumurruqem Wagsiisak Qafár Rakaakayak Doolat Angaarawih Biiro Tecee Maybalaalaqa.

Qafár Rakaakayih Doolat Kee Inkih Tan Qafar Ummatta Ogaysimiyya Le Gurral Sittâ Luk Gacak Ni Baaxoh Ximokraasih Dadalah Gexsoh Kaxxam Meqeh Tan Agat Caddol 7heele Addah Gexsitak Sugte Dooro Nabam Meqeeh Tonnah Kaadu Aydaadu Le Gurral Tumurruqe.

Ta Dooro Ni Rakaakayih Caddol Meqe Gurral Gaba Kaltuh Xiqsissem Doorok Naharay, Dooroh Ayro Kee Doorok Gamadih Gexso Inkih Saay Kee Salaamay, Curriyat Kee Qadliinô Le Gurral Gexsitteh Tanim Rakaakayak Doolat Angaarawih Biiro Rufto Luk Qaddossa.

Ni Rakaakayal Gexsitak Sugte Dooro Qimbisse Ayrok Xabba Haanamay Ilaa Tamuruqem Fan Madqa Elle Tascassenna Kee Dooro Miracsentitte Elle Tascassennal Gexsitak Sugte.

Baxsaluk Doorok Naharal Gexsitak Sugte Ummattah Uguugusuy, Missoynaanih Anaakar Kee Ummattah Hangisso Yaceenimih Taamoomi Ni Ummatta Ximokraasih Siiratal Luk Sugen Kibal Kee Bica Qaduuk Aybaluk Sugen.

Rakaakayal Saay Kee Salaam Dagortiiy, Siyaasa Missoynaani Kee Amôladih Rakaakay Miraaciini Dooro Saay Kee Salaamal Tamaraquh Luk Sugen Doori Fayya Luk Sugem Tamixxige.

Dooroh Ayro Yumbulle Ummatta Gabah Assagolli Kaxxam Muquk Sugem Kee Ximokraasih Caalat Nagay Baxxaqisak Sugem Tamixxige. Ni Rakaakayih Dariifah Ororro Kee Sugteh Tan Kaxxa Niqna Tuk Ablekkal Dariifah Ummatta Saaku Waqla 12:00 Xabba Haanam Doorô Fanteenanil Geytimak Xongolo Acayuk Sugen.

Rasi Kasleey, Qunxaaneytay, Sayyoy, Dagar Erkaanale Marittey Tonnah Kaadu Ulloluh Tan Inonti Raaqekkal Fayyale Uguugus Kee Masquuliyat Keenih Antaabuk Baaxo Baxiini Ceelok Awquk Milaagu Neh Baahele Axcuk Elle Yeemenen Doorenit Doorak Yuybullen Macal Baaxoh Ceelallo Yakkem Xiiqa Ximokraasih Siirat Kinnim Tamixxige.

Ta Aydaadi Dooroh Gexsit Saay Kee Salaamay, Ximokraasih Gital Tumurruqem Rakaakayal Dooro Kattatak Sugte Makaadoy, Agatak Dooro Porxik Rakaakay Luddih Kutbeh Buxay, Anaakarak Xayyowte Siyaasa Missoynaaniy Tonnah Kaadu Rakaakay Poolisik Edde Caba Miracsenta Sittâ Luk Teyyeeqe Maybalaalaqal Qaddosse.

Gexsitak Sugte Dooroh Addat Hebelto Saay Taqabi Yekkek Hinnammay Dooro Madqat Yaaqiteenimih Caalat Ginniimekkal Toobokiinu Kee Siirat Elle Yafsice Gurral Dooro Tumurruqem Ceelallo Takke Abto Kinni.

Qafár Rakaakayih Doolat Ta Aydaadi Gexsot Yangele Maraay, Saay Dacrisak Sugte Maritte Kee Ximokraasih Siirat Tessekexxe Inkih Tan Rakaakay Ummattay, Saay Dagortiy, Dooro Abnisa Kee Siyaasa Missoynaanik Inkih Fayyale Galto Yaydaare.

Mayso Inkih Tan Qafar Ummattah Mayso, Itiyopiyah Mayso Kinni, Xongolo Acayuk Ximokraasi Siiratih Xisot Gaba Assagalluk Temeete Ummattak Sin Aydaadi Gabbaaqimak Waarele, Qafar Doorteh, Itiyipiya Doorteh.

Qafár Rakaakayak Doolat Angaarawih Biiro