“Goonâ Farmoh Kabbaaniyta Ganeenitih Gilitta Qafar Matan!”

Addis Ababa,Agda Baxisso 12,2018 (FMC) Goonâ Farmoh Kabbaaniyta Ganeenitih Gilitta Qafar ane-waytam Ciggiila Perezxentih Bilhadal Maddur Kilasterih Koobaahiseey, Pilaan Biirok Naharsí Saqalah yan Massakaxxa le Qali Macammad Macmuud yescesse

Gifta Qali Macammad Macmuud tamah iyyem Kilbattî Rasih gubat raqta daqortil Waktí Caalat Wagittaamal akkuk sugte qokol taamoomi kusaaqiseh yan udduru.

Kilbattî Rasuk Waktí Caalat wagittaamal, baxsa luk Saay kee Salaam diggoosaanamaay, ganeenit kee goona itta xabba hayteh gibbatan xinkalit taamoomik ummatta cibaare abittuh takkem faxxinta taamoomiiy, Afkanitteey, Agatak 7tô dooro Salaamah takkuh fiddintam faxxinta fido kee gulgulussooy, kalah kaadu Ayyuntak daddos esseroora wagittaamal rakaakayak Leedâ Partih Kutbeh buxah Afkan Kee koobaahissol sissin taamoomi akkuk sugte.

Akkuk sugte taamoomi kee uguugusul tekke taamoomi kee geytime xalul Daqorti Kilasteril baxsimak gabbaaqu xayyooseen.

Tama gabbaaqul Ganeenit kee goona Salaam darraqoosaanamak ayyunti isinni salaam isinnih elle dacrisoonuh Miraaciinuuy, Qunxaaneytaay, Kasleey, Diini abbotiiy, Sayyoo Kee Kabxa abeenit ummaan caddol isi qaaqak yawqeenimil ittingey gufeenim diggowte.

Agatak 7tô dooro meqe gurral takkuh qimmiseh tan gulgulusso meqe qimmo kinnim kee raaqeh yan dagoo uddurih addat baxsa le gurral takkuh ummaan daqaaral afkanitte diggoowak geytintam qaddowte.

Rasí gubat raaqa Sagla Daqar kee inki magaalah xiinissoh Sidiica Kilasteril kurak yekke Kusaaqal Daqortiiy, Rasu kee Rakaakay caddol gabâ culsa faxxa ximmooma baxisak afkanitte elle maqarrowtam dudda cogdaadi daffeesaanam duuduntem yescesseh yam Gifta Qali Macammad Macmuud baxsa luk Salaam Salaluuy, Ganeenit gorrisan boq kee balluq debrimuh ayyunti ummaan caddol ayballuk geytiman fayxi kee gulgulusso assakatlem diggoyse.

Ayyuntak daddos esseroora arac geytuh Rakaakay doolat isi dudda kee meqem abittoh eglaalih fanal Aygadad kee ayfaaf wadbisaanamal assakat le taamoomi akkuk geutinta wakaay takkay uxih raqte foxaaxi kibbintuh akkuk geytinta gabbatitte tanim kassiise.

Ganeenit baxsa luk Kilbattî rasu Farmô carbih mabraka abtuh abak geytinta gabbatittel baxaysittuh aham fanah ummattah addal tekke taamoomik meqe xali anballuk geytimam yescesseh yan Gifta Qali Macammad Qafar isi aydaadul irô naqboytak maadu dacrisseh akke-waytek irô naqboytih farmoh isi baaxo carbi faage abteh aaxige waytam kee away kinni-way Goonâ Farmoh Kabbaaniyta Ganeenitih Gilitta Qafar matanim yescesse.