Itiyoppiyak Qaran Merrah Egla Sanatal 20 Miliyoonuuk Daga Yakke Marah Merrah Ayfaafay Acayuk Geytima – Gifta Mesfin Taasew Addis Ababa, Qado Dirrik 30, 2018 (FMC) Itiyoppiya Qaran Merrah Egla 150 Daga Takke Qasri Tayyaaroori Abbaxuk Sanatal 20 Miliyoonuuk Daga Marah Qaran Merrah Ayfaafay Acayuk Geytimaanam Itiyoppiyak Qaran Meerah Eglah Saqal Gifta Mesfin Taasew Qaddoose. Tama Saqal Itiyoppiyak Qaran Merrah Eglak 80heele Sanatah Edde Xissimte Qaffayda Wagsiisak Yeceh Yan Maybalaalaqal:- Ta Qaran Merrah Egla Tatre 80 Sanatih Addat Baxaabaxsa Le Adafitteh Addak Taturak, Tonnah Aqayyaare Cubbit Awaquk, Asaakuk Fayya Le Caddoh Xalootu Fan Guftam Xiqteh Tanim Yiysixxige. Fooca Fan Taturteh Tan Sanootak Baritak Ila Farangi Liggidih Loowok 2040 Fan Gufa Xer Udduurih Ikraaro Bicisak Ta Qaran Merrrah Eg;a Baad Caddibnal Anaakaratam Akah Xiqtannah Aboonuh Taamitak Geytimaanam Baxxaqise. Qaran Merrah Egla Away Le 145 Takke Baad Caddibnaay Tonnah 23 Takke Baaxoh Addah Wadba Lem Ascassuuk:- 150 Daga Takke Qasri Tayyaaroori Abbaxuk, Sanatal 20 Miliyoonuuk Daga Yakke Marah Qaran Merrah Ayfaafay Acayuk Geytimaanam Qaddoose. Tahak Ugut Abak Afrikak Qabursi Caddoh Tayyaarah Egla Akah Takkennah Tet Abteh Tanim Kassiise. Ta Qaran Merrah Egla Farangi Liggidih Loowok 2040 Wadba Akak 243 Fan, Tayyaaroori Kaaduk 350, Duyye Merra Away Leh Tan Sanatak 850 Alfih Toonuk 1 Ximmooy 2 Miliyoonih Toonih Fanah, Tonnah Safarah Yan Mara Kaaduk Sanatal 60 Miliyoonu Fan Fayya Haanam Kee Sanat Culenta Kaaduk 30 Biliyoonih Doolar Gufussuh Taamitak Geytimtaam Qaddoose. Tama Xiso Itiyoppiyak Maddur Kee Ayyuntiino Dadalih Sissikaaneh Isi Doori Digirak Geytimaat Yaabe. Ta Qaran Merrah Eglak 80heele Sanatih Qaffayda Meqe Gurral Yassakaxxoonuh Bicat Geytimaanam Kee Ciggiila 6 Ayyaamih Addat Baxaabaxsa Le Taddeeraaril Assakaxxeloonum Kassiise.