Qafar Baaxol Qusubih Geytimte 2.6 Milliyonih Karmale Lafak Aysaxaxag Asaaku Samaral Yekke
Addis Ababa,Agda Baxisso 19,2018 (FMC) Rakaakayak wacaysir biiro Mille logya xiqsitta Lafat Fokkaqo Abe Kee Kusaq Abta Butta Mille Daqarak sarayti makaftal geyteh tan paranthropus Nadot Loowimta lafay 2.6 milyoonih karmale Asaaku Qaduuk Yeysexexegen.
Rakaakayak wacaysir Biiroh miraaciinu kee baxaabaxsale Qafar baaxol lafof fokkaaqo abtah tan buttaatiy mango elle geytumte ta aysaxaal fakkenta abe wacaysir biirok naharsi miraacah yan gifta ibraahim cummad away weeqayti 2 Qaxal 10ak daga takke buttaatiy lafof fokkaaqol tamitta tanim qaddoosee.
Xerbudduuruk xabba haanam mango nadoh lafof elle geytimaah baad caddol Qafar sahdayti baxih raceena kinnim sumaaqisak geytimam takkay immay aham fan woodariifah ayyunti akak geya tuxxiq ane waam Kassise.
Qusba sahdayti baxih lafa qafar baaxol geytimte yaanam Qafar ayyuntah tuxxiq alle waytaamih taagah fokkaaqo abah yan dagar elle aban baaxoh ayyuntah daddos takkeemik tukteena akah aban innah kenlih walalak geytimaanam yiysixxige.
Itiyoppiyak daaran kee fokkaaqo redeena aham fan edde gexam dergi saaku suge inki fantenah siiratih gexsit kinnim fokkaaqeenit Rakaakay addal abta taamah xalu Rakaakay addal Yaybeleleqeenim kaxxa taqabi kinniim yubluuse.
Ataqabi raaqisoonuh daaran reedeena inki fanteenah gexsit cabak kulli Rakaakay isi afto akah yallennah abuh rakaakayaay, daaran reedeena kee fokkaaqeenit tittalih walalak agexsit akah massoowannah abaanam faxximta yaanam iyyen.
Qusba lafa geyteh tan mille-logyah buttah miraacah yan professor Zeresennay alemseggex qusbih qafar baaxol geeh yan lafah fokkaaqo kee kusaaqat 14 sanat sugem yiysixxige.
Alafa duma sugte lafoofuk baxsale nadoy sahdat kaxxam xayi kinnim kee itopiya/Qafar adambaxi ginoh raceena boolul bol iyyoonuh ankusuk sugte lafay kaxxam faxxiimak sugte kinnim Qaddose.
Alafa duma gabbi qaxih afrika kee kiblatti kiiniyal geytimteh sugteeh aham fan Itiyoppiyal geytimekkah sugtem tookome gino kinnino yaanamal sinam net edde qalalak sugte kinnim kassiisaak,alafa geeniik gamadal Qafar tookome ginoh raceena kinniimil ken falamtam akak raaqe waytu wayta lafa kinnim yiysixxige.
Kalifa Kadir