Qafar Rakaakayak saay kee salaam caagiidah Biiro Baaxoh idoola lih wakti caalat wagsiisak Namma Ayroh gexisak Suge walal yumurruqe
Addis Ababa,Ciggilta Kudo 23,2018 (FMC) Qafar Rakakayak Rasi Kasleey mamaxxaga leh tan Maritte kee mango iddoola edde tengeleh tan ta Walalak alifil Rakaakayak naharsi saqal Cajji Awwal Qarba elle geytimaak baaxo kasle ugusseh tan esseroorah baarle gacsa abe.
naharsi saqal Cajji Awwal Qafar Rakaakayih doolat isi baaxok raqtem elle geyannih macalat yanim akke waytek marah yecee baaxo taham fan ane waytaamak baarle addaffakoot abe.
Salaam dacrisaanam dubuh tan exxay akak qambaalaana ane waytaah dubuh akah meqe exxa ane waytaamih taagah salaam dacrisaanam kulli num isi cankaay isi daalaak qimbisak inkih yan dariifah salaam diggoosaanamal kulli mari isi dirkik yawqem faxximtaamih farmo tatruse.
Saay kee salaam biirok naharsi miraacah yan komishiner Acmad Cummad ta walalak hadaf away nidariifal tan Geopolitics siyaasaay cuggaane kee Qafar addah salaam wagsiisaak tu elle taninnal walalak baxoh idoola kee doolat inkim akak aaxaguk akah kaqaadan inal walaloonu kinnim yiysixxige.
Baxsaluk ganeenit abtah tan propagandah baxcisaanah yanin dirab kee ane waynu wagittaamal baarle walal abeeniih Tonnah Rakaakayak addal yan caalat maca ceelamaay, xayih namma daqar yekke xalol ayyuntih fanat suge cede way wagittaamal adda xer walal abak, sugeh yan cedeway luk sugteh tan ummatta edde yafqeenim xiiqimtem Baxxaqsen.
Salaam akah dacrisaanam yeexegen dagar akke waytam kee salaam sinna akah meqe maray baxissa alle waytaamih taagah salaam dacrisaanamal ayyunti qunxih kaxxih doolat xaqut gacak isinni dariifal salaam darraqote akah waannah abaanam faxximtaamih seeco tatruse.
Ta walalat tengeleh tan baaxoh idoola ta walalal mangoomuy waagusak sugeenik adda cedaanam xiqeeniih doolat edde tan gexsit elle akkaluk sugen innaak aysuk geenim kee baaxo qiisah kaleeni yaanam numma akke sinnim akak cedeenim qaddooseen.
Isinniik abbaxuk qafar baaxol salaam akah darraqoote waanna kee tamaate dooro salaamal akah takkennah isinnih xiqqa haanamal taamitak ayyunta aynebeebede loonum yiysixxigen.
Kalifa Kadir