የደቡብ ኢትዮጵያ ክልል የታክስ ሕግ ተገዥነት ንቅናቄ መርሐ ግብር እየተካሄደ ነው

አዲስ አበባ፣ የካቲት 18፣ 2016 (ኤፍ ቢ ሲ) የደቡብ ኢትዮጵያ ክልል የታክስ ሕግ ተገዥነት ንቅናቄ እና የግብር ከፋዮች የእውቅና ሥነ ስርዓት በአርባምንጭ ከተማ እየተካሄደ ነው፡፡

በመርሐ ግብሩ የክልሉ ርዕሰ መስተዳድር ጥላሁን ከበደ፣ የገቢዎች ሚኒስትር ወ/ሮ አይናለም ንጉሴ፣ የጉምሩክ ኮሚሽነር ደበሌ ቃበታ እንዲሁም ግብር ከፋዮችና ሌሎችም የክልሉ ከፍተኛ የሥራ ሀላፊዎች ተገኝተዋል፡፡

በሥነ-ስርዓቱ አርቲስቶች እና ስፖርተኞች የግብር አምባሳደር ሆነው እንደሚመረጡ የተገለጸ ሲሆን፤ በክልሉ በተያዘው በጀት ዓመት ታማኝ ግንባር ቀደም ግብር ከፋዮች ሽልማት እና እውቅና እንደሚሰጣቸውም ተመላክቷል።

የገቢዎች ሚኒስትሯ ወ/ሮ አይናለም ንጉሴ በመድረኩ ባደረጉት ንግግር÷ ግብር በመክፈል ለሀገር ታማኝነትን ማሳየት ይገባል ብለዋል፡፡

በክልሉ ከሚያገኙት ገቢ በታማኝነት ለመንግሥት የሚገባውን በመክፈል የኢኮኖሚ ድጋፍ የሆኑ ግንባር ቀደም ግብር ከፋዮችንም አመስግነዋል፡፡

የክልሉ ገቢዎች ቢሮ ኃላፊ ወ/ሮ አለምነሽ ደመቀ በበኩላው÷ በየጊዜው እያደረገ ለሚመጣው የሕዝብ የልማት ጥያቄ ተገቢውን ምላሽ ለመስጠት የሚያስችል ኢኮኖሚ ለመፍጠር የገቢ አማራጮችን አሟጦ መሰብሰብ እንደሚስፈልግ አስገንዝበዋል።

ክልላዊ ወጪን ከ75 በመቶ በላይ ለመሸፈን ታቅዶ እየተሰራ መሆኑንም አመልክተዋል።

በመለሰ ታደለ