የስማርት ኤሌክትሪክ ምሰሶዎች የሀገር ውስጥ የማምረት አቅምን ያሳዩ ናቸው- አቶ መላኩ አለበል

አዲስ አበባ፣ ሰኔ 28፣ 2016 (ኤፍ ቢ ሲ) በኮሪደር ልማቱ የተተከሉ የስማርት ኤሌክትሪክ ምሰሶዎች የሀገር ውስጥ የማምረት አቅምና የቴክኖሎጂ ሽግግርን ያሳዩ መሆናቸውን የኢንዱስትሪ ሚኒስትር መላኩ አለበል ገለጹ።

የኢትዮጵያ አምራች ዘርፍ ከቅርብ ጊዜ ወዲህ በተሰጠው ትኩረት ምርታማነቱ እና በገበያ ውስጥ ያለው ድርሻ ፈጣን እምርታ እያሳየ መምጣቱን የተናገሩት አቶ መላኩ አለበል፤ ከዚህ በፊት ያልተሞከሩ ምርቶች በሀገር ውስጥ መተካት መጀመራቸውን አብራርተዋል።

ለአብነትም በኮሪደር ልማቱ የተተከሉ ስማርት ምሰሶዎች በጠቅላይ ሚኒስትሩ ሀሳብ አመንጭነት ምርቱ በሀገር ውስጥ ለመጀመሪያ ጊዜ ከሁለት ወራት በፊት መመረት መጀመሩን ገልጸዋል፡፡

የስማርት ሲቲ የኤሌክትሪክ ምሰሶ ከአምስት ያላነሱ ንዑሳን ክፍሎች እንዳሉት ገልፀው፤ ይህን ምሰሶ በአንድ ፋብሪካ ብቻ ለማምረት ቴክኖሎጂና ፋሲሊቲ አለመኖሩን ገልጸዋል፡፡

ከዚህ አኳያ የሀገር ውስጥ አምራች ፋብሪካዎች በጋራ በመሆን የጋራ ዲዛይን ሰርተው በትብብር ወደ ማምረት ስራ እንደገቡ መጥቀሳቸውን የዘገበው ኢዜአ ነው።

ይህም የሀገር ውስጥ የማምረት አቅምና የቴክኖሎጂ ሽግግር የታየበት መሆኑን ተናግረዋል፡፡

ፋብሪካዎቹ በቀን ከአንድ ምሰሶ ወደ 26 ምሰሶ የማምረት አቅም በማሳደግ የማምረት ፍጥነትና የአመራርት ስርዓት ባህል ያሳደጉበት አጋጣሚ እንደሆነ አንስተዋል።

ከዚህ ባሻገር በስማርት ኤሌክትሪክ ምሰሶ ምርት 673 ቋሚ የስራ ዕድል የተፈጠረ ሲሆን÷ አምራቾች ከ370 ሚሊየን በላይ ገቢ እንዲያገኙ አስችሏልም ነው ያሉት።

የአፍሪካ ዲፕሎማሲ ማዕከል በሆነችው አዲስ አበባ የተተከሉ የስማርት ኤሌክትሪክ ምሰሶዎች ከሀገር ውስጥ ከተሞች ባሻገር ሌሎች አፍሪካ ከተሞችም ከኢትዮጵያ ተሞክሮ የሚወስዱበት እንደሚሆን ያላቸውን እምነት ገልጸዋል፡፡

የስማርት ኤሌክትሪክ ምሰሶ ምርት ፋብሪካዎች ግብዓት ተመጋግበው ወጥ ምርት ያመረቱበት ብቻ ሳይሆን የቴክኖሎጂና ዕውቀት ሽግግር ከማስገኝቱ ባለፈ የውጭ ምንዛሬ ማዳን የተቻለበት መሆኑንም አንስተዋል፡፡