ከንቲባ አዳነች አቤቤ አዲስ የካፒታል ዕቃ ፋይናንስ ንግድ ሥራ አክሲዮን ማህበር ህንፃን አስመረቁ

አዲስ አበባ፣ ሕዳር 20፣ 2018 (ኤፍ ኤም ሲ) የአዲስ አበባ ከተማ አስተዳደር ከንቲባ አዳነች አቤቤ አዲስ የካፒታል ዕቃ ፋይናንስ ንግድ ሥራ አክሲዮን ማህበር መሃል ፒያሳ ላይ የገነባውን ባለ 11 ወለል ዘመናዊ ህንፃ መርቀው ስራ አስጀምረዋል።

ከንቲባ አዳነች አቤቤ በዚህ ወቅት እንዳሉት÷ አዲስ ካፒታል ለበርካቶች የሥራ ዕድል በመፍጠር እና ተኪ ምርቶች እንዲበራከቱ በማድረግ አይነተኛ ሚና እየተጫወተ ይገኛል።

አዲስ የተገነባው ህንፃ ለባንክ፣ ለኢንሹራንስ እና ለቢሮ አገልግሎት ምቹ ሆኖ የተገነባ መሆኑን ገልጸው÷ የህፃናት ማቆያ፣ የአካል ማጎልበቻና ካፍቴሪዎችን ጨምሮ ለሰራተኞች ምቹ የስራ ከባቢ እንዲሆን ተደርጎ ተገንብቷል ነው ያሉት።

ከተማችን ጀምሮ የመጨረስ እና ቃልን በተግባር የመፈፀም ማሳያ በመሆኗ በየሳምንቱ አዳዲስ የነዋሪውን ተጠቃሚነት የሚረጋግጡ ውጤቶችን እያበሰርን ነው ሲሉም ተናግረዋል።

የከተማ አስተዳደሩ ም/ከንቲባና የአክሲዮን ማህበሩ የቦርድ ሰብሳቢ ጃንጥራር አባይ በበኩላቸው÷ ህንፃው ከሦስት ዓመት ባነሰ ጊዜ ተገንብቶ መጠናቀቁን አንስተዋል።

አክሲዮን ማህበሩ በ500 ሚሊየን ብር ካፒታል የዛሬ 11 ዓመት መመስረቱን አስታውሰው÷ ለከተማ ሊዝ ፋይናንስ መፍትሔ መሆንን ዓላማ አድርጎ እንደነበርም ተናግረዋል።

ማሽነሪዎችን፣ የግንባታ እና ኢንዱስትሪ መሳሪያዎችንና ግብዓት በማቅረብ የሚታወቀው አክሲዮን ማህበሩ÷ በማኑፋክቸሪንግ፣ ኮንስትራክሽንና ግብርና ዘርፎች ወሳኝ ሚና እየተጫወተ እንደሚገኝ ገልጸዋል።

የአዲስ ካፒታል ዕቃ ፋይናንስ ንግድ ሥራ አክሲዮን ማህበር በአሁኑ ወቅት ሃብቱን 3 ነጥብ 3 ቢሊየን ብር ማድረሱም ተመላክቷል።

በሲፈን መኮንን

ፈጣን እና ወቅታዊ መረጃዎችን ለማግኘት፡- YouTube www.youtube.com/@fanamediacorporation Facebook FBC (Fana Broadcasting Corporate S.C.) Facebook https://web.facebook.com/fanasport Facebook WMCC Telegram t.me/fanatelevision Website www.fanamc.com TikTok www.tiktok.com/@fana_television WhatsApp www.whatsapp.com/channel/0029VbB0dRxG8l59MUkoWR29 Amharic Entertainment YouTube www.youtube.com/@fanaentertainment TikTok www.tiktok.com/@fanamc_entertainment Amharic Podcast YouTube www.youtube.com/@fanamcpodcast በመወዳጀት ይከታተሉን፡፡

ዘወትር፦ ከእኛ ጋር ስለሆኑ እናመሰግናለን!