ዛሬን ማወቅ ነገን ለመስራት ብቻ ሳይሆን በትክክል ለመተንበይ ያግዛል – ጠቅላይ ሚኒስትር ዐቢይ (ዶ/ር)

አዲስ አበባ፣ ሕዳር 20፣ 2018 (ኤፍ ኤም ሲ) ጠቅላይ ሚኒስትር ዐቢይ አሕመድ (ዶ/ር) ዛሬን ማወቅ ነገን ለመስራት ብቻ ሳይሆን በትክክል ለመተንበይ ያግዛል አሉ፡፡

ጠቅላይ ሚኒስትሩ “በመደመር መንግሥት ዕይታ፣ የዘርፎች እመርታ” በሚል መሪ ሀሳብ ለብልፅግና ፓርቲ ከፍተኛ አመራሮች ሲሰጥ የቆየውን ስልጠና አስመልክቶ የማጠቃለያ ገለጻ አድርገዋል፡፡

ሥልጣኔን፣ ታሪክን እና ዘመናዊነትን በትክክል ካልተገነዘብን ዛሬ ለመስራት እንዲሁም ነገ ያሰብነውን ለመከወን ያስቸግራል ነው ያሉት፡፡

ጠቅላይ ሚኒስትሩ በዚሁ ወቅት እንዳሉት፥ የኢትዮጵያ ከዘመን መነጠልና ኋላ መቅረቷ ብዙ ጉዳት አስከትሏል፡፡

የመደመር መንግሥት ዋነኛ ነጥቦች መፍጠር፣ መፍጠን፣ ማብዛትና ማጥራት መሆናቸውን ጠቅሰው፥ ከብዙ ፈጠራዎች ውስጥ ጥራት ያላቸው ጉዳዮች እንደሚገኙና ብዙ ያልፈጠረ ጥራትን ማረጋገጥ እንደማይችል ነው የገለጹት፡፡

የሰው ልጅ ታሪክ የስልጣኔ ታሪክ መሆኑን ገልጸው፥ የቆምንበት ባህል፣ እምነት፣ እሴትና ተቋማት እንዴት እንደተፈጠሩና በምን መንገድ አድገው እዚህ እንደደረሱ መመርመርና ማወቅ ያስፈልጋል ብለዋል፡፡

የዛሬ ውሳኔዎች፣ ድርጊቶችና ትልሞቻችን የሚፈቱበት መንገድ ምን አይነት ነገ ሊፈጠር እንደሚችል ለመተንበይ የሚያስችል ግንዛቤ እንዲኖረን ያደርጋል ሲሉም አብራርተዋል፡፡

ሥልጣኔ ማለት የባህላዊና ልማታዊ ደረጃ ከፍታ ሲረጋገጥና በአንድ ሀገር መልማት፣ በባህል ማደግ እንዲሁም ለዜጎች አኗኗር የሚስማማ የኑሮ አኗኗር ዘዬ እና ሥርዓት መፍጠር ሲቻል የሚታይ ሁኔታ መሆኑንም ገልጸዋል፡፡

ስልጣኔ ሲባል ሰው፣ ከተማ እና የአኗኗር ዘዬ መሆኑን መረዳት ያስፈልጋል ነው ያሉት፡፡

በወንድማገኝ ጸጋዬ