ለኢትዮጵያ ብልጽግና መሰረት ለመጣል በእኩል ፍጥነት መጓዝ አለብን – ጠቅላይ ሚኒስትር ዐቢይ (ዶ/ር)

አዲስ አበባ፣ ሕዳር 20፣ 2018 (ኤፍ ኤም ሲ) ጠቅላይ ሚኒስትር ዐቢይ አሕመድ (ዶ/ር) የኢትዮጵያን ብልጽግና የሚያረጋግጥ መሰረት ለመጣል በእኩል ፍጥነት መጓዝ አለብን አሉ፡፡

ጠቅላይ ሚኒስትሩ በብልጽግና ፓርቲ የከፍተኛ አመራሮች ስልጠና ማጠቃለያ ላይ “በመደመር መንግሥት ዕይታ፣ የዘርፎች እመርታ” በሚል ይዘት በመደመር መንግስት እሳቤዎች ዙሪያ ገለጻ አድርገዋል፡፡

የኢትዮጵያን ብልጽግና መስራትና መሰረት መጣል የምንፈልግ ከሆነ በእኩል ፍጥነት መጓዝ ይኖርብናል ሲሉ አስገንዝበዋል፡፡

ኢትዮጵያ ቀደምት ሀገር የነበረች ቢሆንም በጊዜና በዘመን በመቀደሟ ወደ ኋላ መቅረቷንና ዘመን ሲለወጥ ባለችበት ተቸክላ ለመቆየት መገደዷን አንስተው፥ ያም ቢሆን ግን ከ3ሺህ ዓመታት በላይ በሀገርነት ጸንታ መቆየቷ መልካም ሁኔታ መሆኑን አመልክተዋል፡፡

የኢትዮጵያን መዘግየት፣ ማሽቆልቆል፣ መድከምና መደህየት ብንናገርም ለጋራ ሀገራዊ ፍላጎት መነጋገር የምንችልበት ሀገር ያለን መሆኑ ተመልሰን ለመነሳትና ለማደግ ተስፋ መሆኑን ነው የገለጹት፡፡

የሀገር እድገት ከልካይ የሆኑ አካላዊ፣ ተቋማዊ ወይም ስርዓታዊ እንዲሁም ባህላዊ አጥሮችን መስበር ካልተቻለ ሀገራዊ፣ ክልላዊ ብሎም የከተሞችን እድገት ማምጣት አይቻልም ነው ያሉት፡፡

ለአብነትም አዲስ አበባ ከተማ እነዚህን አጥሮች መስበር መቻሉን ጠቅሰው፥ እውቀትና ገንዘብ ያለው እንዲሁም ኢንቨስት ለማድረግ የሚፈልግ ሰው መጠቀም የሚችልበት ዐውድ መፈጠሩን አንስተዋል፡፡

በአንጻሩ በክልሎች እውቀትና ገንዘብ ሳይሆን ከየት ነው የመጣኸው የሚሉ አጥሮች ክልሎች እንዳያድጉ እንቅፋት እየፈጠረ መሆኑን ጠቁመዋል፡፡

ክልሎች እነዚህን አጥሮች በመስበር እውቀትና ገንዘብ ያላቸውን ሰዎች መሳብ ካልቻሉ በመዲናዋ የተገኘውን እድገት ለመድገም እንደሚቸገሩ ነው ጠቅላይ ሚኒስትሩ ያስገነዘቡት፡፡

በኃይለማርያም ተገኝ