በዓለም ላይ ከነበሩ ቀደምት ስልጣኔዎች መካከል አንዱ ኢትዮጵያ ውስጥ ነው – ጠቅላይ ሚኒስትር ዐቢይ (ዶ/ር)

አዲስ አበባ፣ ሕዳር 20፣ 2018 (ኤፍ ኤም ሲ) ጠቅላይ ሚኒስትር ዐቢይ አሕመድ (ዶ/ር) በዓለም ላይ ከነበሩ ቀደምት ስልጣኔዎች መካከል አንዱ ኢትዮጵያ ውስጥ ነው አሉ፡፡

“በመደመር መንግሥት ዕይታ፣ የዘርፎች እመርታ” በሚል ጠቅላይ ሚኒስትር ዐቢይ አሕመድ (ዶ/ር) ለብልፅግና ፓርቲ ከፍተኛ አመራሮች ሲሰጥ የቆየውን ስልጠና አስመልክቶ የማጠቃለያ ገለጻ አድርገዋል፡፡

ጠቅላይ ሚኒስትር ዐቢይ (ዶ/ር) በዚሁ ወቅት እንዳሉት፥ ስልጣኔ የተወለደው የሰው ልጅ ራስን ለማቆየት በቂ ምግብ በመብላት አስፈላጊ በመሆኑ ሌማቱን ለማትረፍረፍ ባደረገው ተጋድሎ ነው፡፡

ሰው ሲሰበሰብ ልማት ብቻ ሳይሆን ጥፋትና ግጭትም እንደሚኖር ጠቅሰው፥ ያንን ለመፍታት የሕግ ሥርዓት ተፈጥሯል ሲሉም አብራርተዋል፡፡

ሰው በሌማት ራሱን ለማትረፍረፍ ገበታውን ለመሙላት ካደረገው ጥረት ከተማና መንግስትን ለመፍጠር እስከሄደበት ድረስ በየጊዜው ፈጠራ መኖሩን አስረድተዋል፡፡

አፍሪካ ውስጥ ካሉ 15 ትላልቅ ግድቦች መካከል ታላቁ የኢትዮጵያ ሕዳሴ ግድብን ጨምሮ አራቱ ኢትዮጵያ ውስጥ እንደሚገኙ ጠቁመው፥ ያም ቢሆን ኢትዮጵያ ዛሬ ላይ በውሃ ኃይል ማመንጫዎች ማምረት የሚገባትን ያህል ኃይል እያመረተች እንዳልሆነ ተናግረዋል፡፡

በዓለም ላይ ከነበሩ ቀደምት ስልጣኔዎች መካከል አንዱ ኢትዮጵያ ውስጥ እንደነበር አስታውሰው፥ ለአብነትም ላሊበላ፣ ሶፍ ኡመር እና አክሱም ድንጋይና የሰው ልጅ ያላቸው ትስስር በደንብ ጎልቶ የሚታይባቸው ቦታዎች እንደሆኑ አስረድተዋል፡፡

ኢትዮጵያ ውስጥ እንደዚ ያለው ስልጣኔ በእኛ ስንፍና ብዙ ያልተነገረለት ነው ያሉት ጠቅላይ ሚኒስትሩ፥ የላሊበላ ኪነ ህንጻ በታነጸበት ዘመን ብቻም ሳይሆን ዛሬም ድረስ እንደዚያ አይነት የምህንድስና ጥበብ እንደሌለ ነው የገለጹት፡፡

በኢትዮጵያ ውስጥ ሥልጣኔ ከነበረ ማሽቆልቆል እንዴት ሊመጣ ቻለ ለሚለው ጥያቄ ውጫዊና ውስጣዊ ምክንያቶች የመንግስታት መዳከም፣ የሕዝብ ብዛትና የአቅርቦት መሳሳት እንደ ዋነኛ ምክንያት ተጠቃሽ ናቸው ብለዋል፡፡

በወንድማገኝ ጸጋዬ