በመቱ ምርጫ ክልል የምርጫ ቁሳቁሶች ሥርጭት እየተጠናቀቀ ነው

አዲስ አበባ፣ ግንቦት 22፣ 2018 (ኤፍ ኤም ሲ) በመቱ ምርጫ ክልል ስር በሚገኙ ምርጫ ጣቢያዎች የቁሳቁስ ሥርጭት እየተጠናቀቀ ነው አሉ የምርጫ ክልሉ ጽ/ቤት እና የጣቢያዎቹ አስተባባሪዎች።

የምርጫ ክልሉ ጽ/ቤት ኃላፊ ናትናኤል ሞገስ፥ በመቱ ምርጫ ክልል በአጠቃላይ 73 ምርጫ ጣቢያዎች መኖራቸውን እና ቁሳቁስ ወደ ሁሉም ምርጫ ጣቢያዎች የማጓጓዝ ሥራ እየተጠናቀቀ መሆኑን ተናግረዋል።

ከቁሳቁስ ሥርጭቱ ጎን ለጎን ደግሞ በየምርጫ ጣቢያዎቹ ለድምጽ አሰጣጥ ሂደቱ የሚያስፈልጉ የቦታ ዝግጅት ስራዎች ላይ በትኩረት እየተስራ መሆኑን ጠቁመዋል።

በምርጫ ክልሉ የመናኸሪያ ምርጫ ጣቢያ አስተባባሪ ወጣት ናትናኤል ደስታ በበኩሉ፥ ለምርጫው የሚያስፈልጉ ቁሳቁሶች በወቅቱ ወደ ጣቢያው መድረሳቸውን ተናግሯል።

አሁን ላይ የድምጽ መስጫ ቦታን የማመቻቸት ስራ በመጠናቀቅ ላይ እንደሚገኝ ማስረዳቱን ኢዜአ ዘግቧል።

የምርጫ ቁሳቁስ መረከባቸውንና ለድምጽ አሰጣጥ ሂደቱ ምቹ ሁኔታዎችን የመፍጠር ስራ እየተከናወኑ መሆናቸውን የተናገሩት ደግሞ ሌላው የምርጫ ጣቢያ አስተባባሪ አቶ ጅሬኛ አመኑ ናቸው።