የተስፋ ብርሃን የምገባ ማዕከላት፣ የማኅበራዊ ፍትሕና የሰው ተኮር ልማት ማሳያዎች…

የአንድ ከተማ ዕድገትና ሥልጣኔ የሚለካው በረጃጅም ሕንጻዎቿና በዘመናዊ መንገዶቿ ውበት ብቻ ሳይሆን፣ እጅግ ዝቅተኛ የኑሮ ደረጃ ላይ የሚገኙና ረዳት የሌላቸውን ዜጎቿን በምን መልኩ እንደምትደግፍ ጭምር አስባ በመተግበሯ ነው።

የአዲስ አበባ ከተማ አስተዳደር መዲናዋን የፈጠራ፣ የእውቀት እና የብልፅግና መዲና ለማድረግ ሌት ተቀን እየሠራ ይገኛል።

ከእነዚህ ዘመናዊ መሠረተ-ልማቶች ጎን ለጎን፣ የዜጎችን ማኅበራዊ ደኅንነት ለማረጋገጥ የተዘረጉት የተስፋ ብርሃን የምገባ ማዕከላት የከተማዋ አዲስ ሰብዓዊና ማኅበራዊ ምሰሶዎች ሆነዋል።

በአሁኑ ወቅት የከተማ አስተዳደሩ 30 የሚደርሱ ዘመናዊ የምገባ ማዕከላትን ገንብቶ ለአገልግሎት በማብቃት፣ በከተማዋ ምንም ዓይነት በምግብ የተቸገረ ሰው እንዳይኖር የማድረግ ታላቅ ሰብዓዊ ራዕይን እውን እያደረገ ነው።

የተስፋ ብርሃን የምገባ ማዕከላት በከተማዋ በሁሉም ክፍለ ከተሞች እና ወረዳዎች ተደራሽነታቸውን እያሰፉ ይገኛሉ።

ማዕከላቱ የተገነቡት አነስተኛ ገቢ ያላቸው ዜጎች በስፋት በሚኖሩባቸው እና ለትራንስፖርት ምቹ በሆኑ ቦታዎች ላይ ነው።

ተጠቃሚዎቹ ጧሪና ደጋፊ የሌላቸው አረጋውያን፣ አካል ጉዳተኞች፣ መጠለያና ቋሚ ገቢ የሌላቸው ዜጎች፣ የቀድሞ የሀገር ባለውለታዎች እና ጊዜያዊ ድጋፍ የሚያስፈልጋቸው ነዋሪዎች ናቸው።

እነዚህ ማዕከላት በቀን አንድ ጊዜ ትኩስና ንጹሕ የተመጣጠነ ምግብ በነፃ በማቅረብ የብዙዎችን የዕለት ምግብ ዋስትና አረጋግጠዋል።

ሆኖም ግን፣ ትልቁ ስኬታቸው ዜጎች በንጽሕና እና በሰውኛ መስተንግዶ ሥር ሆነው እንዲመገቡ በማድረግ የዜግነት ክብራቸውን ማስጠበቃቸው ነው።

ቀደም ሲል የሰው እጅ ለመጠባበቅ ወይም ጎዳና ላይ ለመውጣት ይገደዱ የነበሩ ወገኖች፣ አሁን ግን ልክ እንደማንኛውም ዜጋ ተከብረው የሚስተናገዱበትና የመኖር ተስፋቸው የሚለመልምበት ሥፍራ ሆኖላቸዋል።

የምገባ ማዕከላቱ ግንባታና ቀጣይነት የመንግሥት ቁርጠኝነት ብቻ ሳይሆን፣ የሀገር በቀል በጎ አድራጎት ባህል መገለጫ ነው።

ይህ ጥምረት ኢትዮጵያውያን ለአንድ ዓላማ በጋራ ሲቆሙ የሕዝብን ሁለንተናዊ ችግር መፍታት እንደሚችሉ ያሳየ ተግባራዊ ምሳሌ ነው።

የአዲስ አበባ ከተማ አስተዳደር የምገባ ማዕከላት አሁን ላይ ሥራቸውን ከመመገብ ባለፈ ወደ ዘላቂ መፍትሔ አሳድገውታል።

በለሚ ኩራ ክፍለ ከተማ በቅርቡ የተመረቀውን 30ኛውን ማዕከል ጨምሮ፣ ማዕከላቱ ለተረጂዎች ጊዜያዊ ችግራቸውን ከማቃለል ባለፈ በዘላቂነት ቋሚ የሥራ ዕድል እንዲያገኙ የሚያስችሉ የክህሎትና የሥራ ትሥሥር መድረክ እየሆኑ ነው።

ይህም ዜጎች ከጥገኝነት ወጥተው ራሳቸውን እንዲችሉ የራሱን አስተዋጽኦ ያበረክታል።

በአጠቃላይ፣ በአዲስ አበባ እየተስፋፉ ያሉት የተስፋ ብርሃን የምገባ ማዕከላት የከተማዋን ውብ ገጽታ ከሚቀይሩት የኮሪደር ልማቶች ጎን ለጎን የሰው ተኮር ልማት በተግባር የሚገለጥባቸው ድንቅ ሥራዎች ናቸው።

ማንም ሰው በምግብ እጦት ምክንያት ሊቸገር አይገባም የሚለውን መርህ ያነገቡት እነዚህ ማዕከላት የኑሮ ውድነቱን ጫና በመቀነስ ለማኅበረሰባችን ፍቅርን፣ አንድነትን እና ማኅበራዊ ፍትሕን እያረጋገጡ ይገኛሉ።