ሀገራዊ ምክክር ለሰለጠነች ኢትዮጵያ

ሀገራዊ ምክክር ከመጠፋፋት ወደ ሰለጠነ፣ ሰላማዊ እና አካታች ሀገራዊ አውድ ለመሸጋገር የወቅቱ ታሪካዊ እድል ነው።

ለዘመናት የዘለቁ መዋቅራዊ የፖለቲካ ልዩነቶች፣ የታሪክ ትርክት ሽኩቻዎች እና የማንነት ጥያቄዎች በሃይል እና በአሸናፊ-ተሸናፊ ስሌት ለመፍታት መሞከራቸው ሀገሪቱን ለከፍተኛ ማህበራዊ እና ኢኮኖሚያዊ ቀውሶች ዳርጓታል።

የሀገራዊ ምክክር ኮሚሽን የተቋቋመበት ዋናው ዓላማም እነዚህን ስር የሰደዱ ችግሮች በጠረጴዛ ዙሪያ በመፍታት የሰለጠነች እና የበለፀገች ኢትዮጵያን መገንባት ነው።

በሰለጠነች ሀገር ውስጥ የሃሳብ ልዩነቶች የውበት እና የጥንካሬ ምንጮች እንጂ የጦርነት መንስኤዎች አይደሉም።

የኢትዮጵያ ፖለቲካ «እኔ ያልኩት ካልሆነ ሀገር ትፍረስ» ከሚል ጽንፈኛ እይታ ተላቆ ወደ መደማመጥ ባህል መሸጋገር አለበት።

ሀገራዊ ምክክሩ ልዩነቶችን በሰላማዊ ክርክር እና በምክንያት የመፍታት ልምድን ያዳብራል።

በአካታች ባህርይው የፖለቲካ ፓርቲዎች፣ የሲቪክ ማህበራት፣ የሃይማኖት አባቶች፣ ሴቶች፣ ወጣቶች እና በጉዳዩ ላይ ያገባኛል የሚሉ አካላት በሙሉ ድምፃቸው እኩል እንዲሰማ ያደርጋል።

በአበይት ሀገራዊ አጀንዳዎች ላይ ሁሉንም ወገን የሚያስማማ የጋራ መቋጫ ያፈላልጋል።

የሀገራዊ ምክክር ኮሚሽኑ ከተመሰረተ ጀምሮ በተለያዩ የሀገሪቱ ክፍሎች እና በዲያስፖራው ማህበረሰብ ዘንድ የአጀንዳ ማሰባሰብ እና የምክክር መድረኮችን በስፋት ሲያከናውን ቆይቷል።

በአሁኑ ወቅት ሂደቱ እጅግ ወሳኝ ደረጃ ላይ ደርሷል። በተለዩት ስምንት ዋና አጀንዳዎች ላይ በአዲስ አበባ ለመወያየት ለሐምሌ 8፣ ቀን 2018 ዓ.ም ቀጠሮ ይዟል።

እስካሁን በተመቻቹ መድረኮች በሚሊዮን የሚቆጠሩ ኢትዮጵያውያን የሀገራቸውን የወደፊት እጣ ፈንታ ለመወሰን በቀጥታም ሆነ በተወካዮቻቸው በኩል ድምፃቸውን አሰምተዋል።