የብልጽግናዋ ጮራ፣ በራስ አቅም እየተጻፈ ያለው የኢትዮጵያ አዲስ ታሪክ

አዲስ አበባ፣ ነሐሴ 6፣ 2018 (ኤፍ ኤም ሲ) ዓለም ትናንት ኢትዮጵያን በጦርነት፣ በድርቅ እና በተረጂነት ትርክት ሲያውቃት፤ ዛሬ ግን በአፍሪካ ቀንድ አዲስ የኢኮኖሚ ካርታ እየቀረጸች ያለች የብልፅግና ተምሳሌት ሆና በግርማ ሞገስ ብቅ ብላለች።

ይህች ሀገር የገጠሟትን ውስብስብ ፈተናዎች ወደ እድል በመቀየር፣ ከራሷ አልፋ ለቀጣናው የሚተርፍ ግዙፍ የኢኮኖሚ አብዮት እያካሄደች ትገኛለች።

ይህ አዲስ የኢትዮጵያ ትንሳኤ በቃላት ድርደራ ሳይሆን፣ መሬት በነኩ እና ዓለምን በሚያስደምሙ ግዙፍ ስኬቶች የተመሰከረ ነው።

የኢትዮጵያ የቅርብ ዘመን ታሪክ ትልቁ ማሳያ ታላቁ የኢትዮጵያ ሕዳሴ ግድብ ነው። የዚህ ግድብ ልዩ ባህሪ ግዝፈቱ ብቻ ሳይሆን፣ ከዓለም ባንክም ሆነ ከዓለም አቀፍ የገንዘብ ድርጅት አንዲትም ሳንቲም የውጭ ብድር ሳይወሰድበት መገንባቱ ነው።

በሀገር ውስጥና በውጭ ሀገር በሚኖሩ ኢትዮጵያውያን ደም፣ ላብና ጥረት ብቻ እውን የሆነው ይህ ፕሮጀክት፣ የእውነተኛ ሉዓላዊነት ማረጋገጫ ሆኗል።

በአንድ ወቅት በጨለማና በፈራረቀ የኃይል አቅርቦት ትታወቅ የነበረችው ሀገር፣ ዛሬ ለጎረቤቶቿ (ለኬንያ፣ ጅቡቲና ሱዳን) የኤሌክትሪክ ኃይል በመሸጥ የውጭ ምንዛሪ ማግኛ እና የቀጣናው የትስስር ማዕከል ወደመሆን ከፍ ብላለች።

የኢኮኖሚ ጥንካሬ ያለ ጠንካራ ትስስርና ዓለም አቀፍ ንግድ ሙሉ ሊሆን አይችልም። አስቀድሞም የአፍሪካ አየር መንገድ የሆነው የኢትዮጵያ አየር መንገድ፣ አሁን ደግሞ ይበልጥ ግዙፍ ወደሆነ ምዕራፍ እየተሸጋገረ ይገኛል።

አዲሱ የቢሾፍቱ ዓለም አቀፍ አውሮፕላን ማረፊያ፣ በዓመት እስከ 110 ሚሊየን መንገደኞች የማስተናገድ አቅም ይኖረዋል። ይህ ግዙፍ ፕሮጀክት ሲጠናቀቅ አዲስ አበባን ከአፍሪካ አልፎ ለአውሮፓ፣ ለእስያ እና ለመካከለኛው ምስራቅ ዋነኛ የዲፕሎማሲ እና የንግድ መግቢያ በር ያደርጋታል።

ኢትዮጵያ ከሰማይና ከውሃ ኃይል ባሻገር፣ ከከርሰ ምድር በረከቶቿም የኢኮኖሚ አብዮቱን እየመገበች ነው። የወርቅ ማዕድን ልማት በአሁኑ ወቅት ፈጣን እድገት እያሳየ ሲሆን፣ ሀገሪቱ በግብርና ላይ ብቻ የነበራትን ጥገኝነት በመቀነስ አዲስ የውጭ ምንዛሪ ምንጭ እየሆናት ይገኛል።

በሌላ በኩል፣ የኢኮኖሚው የጀርባ አጥንት የሆነውን ግብርና ለማዘመን እና የምግብ ዋስትናን ለማረጋገጥ ግዙፍ ኢንቨስትመንቶች በመፍሰስ ላይ ናቸው።

በአፍሪካዊው ባለሃብት አሊኮ ዳንጎቴ አማካኝነት በሶማሌ ክልል እየተገነባ ያለው የማዳበሪያ ፕሮጀክት አንዱ ማሳያ ነው። ይህ ግዙፍ ተቋም የውጭ ማዳበሪያ ጥገኝነትን በመቀነስ የግብርና ምርታማነትን ለማሳደግ የተነደፈ ስትራቴጂካዊ ርምጃ ነው።

የኢትዮጵያ ለውጥ በባህላዊ ዘርፎች ብቻ የተገደበ አይደለም፤ ሀገሪቱ ወደ ዲጂታሉም ዓለም በከፍተኛ ፍጥነት እየተሻገረች ትገኛለች።

ከዚህም በላይ ታሪካዊ የሚባለው ርምጃ፣ ሀገሪቱ ላለፉት አርባ ዓመታት ዝግ ሆነው የቆዩትን የቴሌኮሙኒኬሽን፣ የባንክ፣ የሪል እስቴት እና የካፒታል ማርኬት ዘርፎችን ለግል ባለሃብቶች ክፍት ማድረጓ ነው።

ኢትዮጵያ ይህንን ግዙፍ የኢኮኖሚ ጉዞ የምታካሂደው በዓለም አቀፍ መድረክ እጅግ ረቂቅ የሆነ የዲፕሎማሲ ሚዛንን በመጠበቅ ነው።

የዓለም አዳዲስ የኢኮኖሚ ኃይሎች ስብስብ በሆነው ብሪክስ አባል በሆነችበት በዚሁ ወቅት፤ ከዓለም አቀፍ የገንዘብ ድርጅት ፣ ከምዕራባውያን፣ ከቻይና እና ከባህረ ሰላጤው ሀገራት ጋር ያላትን ግንኙነት በተመጣጣኝ እና በብልሃት ይዛ ዘልቃለች።

በአንድ ወገን ከመፈረጅ ይልቅ፣ የሀገርን ጥቅም በሚያስጠብቅ መልኩ ከሁሉም ጋር በትብብር የመስራት ጥበባዊ አካሄድን መርጣለች። የኢትዮጵያ የልማት ቁርጠኝነት እና ወደ ፊት የመገስገስ ፍጥነት የማይናወጥ መሆኑን በተግባር እያሳየች ነው።

ዛሬ ላይ ቆመን ነገን ስንመለከት፣ አዲስ አበባ የፈተናዎቿን ያህል በስራዎቿ ልቆ በመገኘት፤ ኢትዮጵያ የአፍሪካ ቀንድ የኢኮኖሚ ሞተር እና የብልፅግና ተምሳሌት መሆኗን ለዓለም እያስመሰከረች ትገኛለች።

በኃይለኢየሱስ መኮንን