የብርሃንና የናፍቆት ድምጾች

አዲስ አበባ፣ ነሐሴ 27፣ 2018 (ኤፍ ኤም ሲ) ክረምቱ ቦታውን ለቅቆ ጸደዩ ሲጠባ፤ የኢትዮጵያ ሰማይ በልዩ የናፍቆትና የተስፋ ዜማዎች ይሞላል።

«እንቁጣጣሽ እንኳን መጣሽ» የሚለው ድምፅ ሲሰማ የዘመን መለወጫ መድረሱ ይታወቃል።

አዲስ ዓመት ከቀን መለወጥ በላይ የሕብረትና የይቅርታ በዓል ነው።

በዚህ ልዩ ወቅት ልባችንን የሚነኩት እነዚያ ዘመን አይሽሬ ዜማዎች ጆሮዋችንን ጠልቀው የሚገቡበት ነው።

በዚህ ውስጥ ደግሞ ዘሪቱ ጌታሁን «እንቁጣጣሽ» የሚለው የተስፋው ዜማ ቀዳሚው ነው።

በደራሲ ተስፋዬ አበበ ግጥም ተደርሶ በዘሪቱ ልዩ ድምፅ ያጌጠው ይህ ዜማ የዘመን መለወጫ ሁነኛ መለያ ነው።

ዘሪቱ አዲስ ዓመት የሰዎች የፍቅርና የአብሮነት እሴቶች የሚታደሱበት እንጂ የቁጥር ብቻ መሆን የለበትም ትላለች።

የሙዚቃ ባለሙያዎች ዜማው አድማጩን ከባህላዊ ትዝታ ጋር የሚያገናኝ ጥልቅ ስነ-ልቦናዊ ኃይል እንዳለው ይስማማሉ።

“እንቁጣጣሽ እንኳን መጣሽ” “በአበቦች መሐል እንምነሽነሽ”

የማቲያስ እሸቱ የአዲስ ዓመት ስራዎች የሩቅ ዘመዶችንና የናፈቁትን ጓደኞች ትዝታ ወደ አእምሮ የሚያመጡ ናቸው።

አዲስ ዓመት የቤተሰብ መቃኛ እና የይቅር መባባያ ሰዓት መሆኑን አርቲስቱ ይገልጻል።

ሙዚቃዎቹ የተገነቡበት የኮርድ ቅንብር አድማጩን በናፍቆት እንዲዋጥ የማድረግ አቅም አለው።

የሙዚቃው ንጉሥ አርቲስት ጥላሁን ገሠሠ እና ሌሎችም አርቲስቶች ያቀረቧቸው የአውዳመት ሙዚቃዎች የሀገራችንን ማህበራዊ ኑሮ በመስታወትነት ያሳዩ ናቸው።

እነዚህ የቀድሞ ዘመን ዜማዎች ዛሬም ድረስ አዲስነታቸውን ጠብቆ ማቆየታቸው የሙዚቃዎቹን አቅምና ጥንካሬ ማሳያ እንደሆነ የዘርፉ ባለሞያዎች ይናገራሉ።

አዲስ ዓመት ሲመጣ የምናስበው አዳዲስ ልብሶችን ብቻ አይደለም፤ የሰውን ልብ ከሰው ጋር የሚያስተሳስረው ያ የድሮ ዜማ ድምፅ ነው።

እነዚህ ሙዚቃዎች ትናንትናችንን ከዛሬ ጋር አገናኝተው ነገን በብሩህ ተስፋ እንድንጠብቅ አቅም ይሰጡናል።

መልካም አዲስ ዓመት!