የጉባ ሀገራዊ የልማት ብስራቶች፡ የነገዋ ኢትዮጵያ ጽኑ መሰረቶች

አዲስ አበባ፣ መስከረም 11፣ 2019 (ኤፍ ኤም ሲ) የሚያጋጥሙ ፈተናዎችን ወደ ዕድል የመቀየር ተሞክሮዋን ያሳደገችው ኢትዮጵያ የዛሬ ሥራዋን በነገ ሕልሟ እየለካች ሁለንተናዊ የልማት ጉዞዋን አጠናክራለች።

የትናንትን ተስፋ ከነባራዊ ሁኔታው ጋር በማገናዘብ ወደ ዛሬ እውነታ እያሸጋገረች፣ የነገውንም ዕድገት በዛሬ መሠረት ላይ እያነጸች ትገኛለች።

ይህ የልማት ጉዞ በአንድ ፕሮጀክት ወይም በአንድ ዘርፍ የሚወሰን ሳይሆን የሀገሪቱን የረጅም ጊዜ አቅም በሚያሳድጉ ተከታታይ ውጥኖች የሚገለጽ ነው።

በዚህ ሒደት ጉባ ላይ የተሰሙት ሰባት ታላላቅ ብስራቶች የኢትዮጵያን ቀጣይ የልማት ጉዞ የሚያመላክቱ ጉልህ ምልክቶች ሆነዋል።

እነዚህ ብስራቶች የዛሬን ፍላጎት ከነገ ዕድል ጋር በማገናኘት፣ በርካታ ዘርፎችን በአንድ የልማት አቅጣጫ ውስጥ ለማስተሳሰር የታለሙ ናቸው።

የታላቁ ኢትዮጵያ ሕዳሴ ግድብ ምርቃት የአንድ ግዙፍ ፕሮጀክት መጠናቀቅን ብቻ አላበሰረም፤ ከዚያ ባሻገር ኢትዮጵያ በኃይል፣ በኢንዱስትሪ፣ በአቪዬሽን፣ በግብርና እና በመኖሪያ ቤት ልማት የያዘችውን ቀጣይ የልማት አቅጣጫም አመላክቷል።

ግድቡ በኃይል ምርት ያለውን አቅም በማሳየት ትልልቅ ሀገራዊ ፕሮጀክቶች ከረጅም ጊዜ ራዕይ ወደ ተጨባጭ ውጤት ሊሸጋገሩ እንደሚችሉ አሳይቷል።

ሰባቱ የጉባ ብስራቶች ከኃይል ምርት እስከ ኢንዱስትሪ፣ ከግብርና እስከ አቪዬሽን እንዲሁም ከከተማ ልማት እስከ መሠረተ ልማት ድረስ የሚዘልቁ ሰፊ የልማት ዕቅዶችን ያካትታሉ።

እነዚህ ብስራቶች የኒውክሌር ልማት፣ የጋዝ ፋብሪካዎች፣ የነዳጅ ማጣሪያ፣ በአፍሪካ ግዙፍ የሚሆን የአውሮፕላን ማረፊያ፣ የማዳበሪያ ፋብሪካ እና 1 ነጥብ 5 ሚሊየን የመኖሪያ ቤቶች ግንባታን ያካተቱ ናቸው።

በየዘርፉ የታቀዱት ፕሮጀክቶችም በተናጠል የሚታዩ ውጥኖች ሳይሆኑ፣ የኢኮኖሚውን ምርታማነትና የሀገሪቱን የልማት አቅም በማስፋት የሚደጋገፉ ናቸው። የኃይል አቅም መስፋፋት ለኢንዱስትሪው የሚያስፈልገውን የኃይል መሠረት ያጠናክራል፤ የማዳበሪያ ምርት መስፋፋት የግብርና ምርታማነትን ለማሳደግ ያግዛል፤ የነዳጅና የጋዝ ዘርፎች ልማት ደግሞ የኃይልና የኢንዱስትሪ አቅምን ይደግፋሉ።

በተመሳሳይ የአውሮፕላን ማረፊያና የመኖሪያ ቤት ልማቶች የከተሞችን ዕድገት፣ ተደራሽነትና የኑሮ ሁኔታ ለማሻሻል ጉልህ አስተዋጽኦ የሚያበረክቱ ናቸው።

በመሆኑም ፕሮጀክቶቹ በኃይል፣ በኢንዱስትሪ፣ በግብርና፣ በአቪዬሽንና በከተማ ልማት ዘርፎች የሚኖረውን አቅም ለማስፋት የታቀዱ ናቸው።

ይህም የኢትዮጵያን ኢኮኖሚ ከተለያዩ ዘርፎች አቅም ጋር በማስተሳሰር የምርት፣ የሥራ ዕድል፣ የኢንቨስትመንትና የገበያ ዕድሎችን ለማስፋት የሚያግዝ አቅጣጫን ያመላክታል።

የጉባ ብስራቶች ትልቁ ትርጉማቸው የሀገር የልማት ምኞት ከሀሳብና ከራዕይ ወደ ዕቅድ፣ ከዕቅድ ደግሞ ወደ ተጨባጭ ሥራ ሲሸጋገር የሚፈጠረውን አዲስ የዕድገት አቅጣጫ ማመላከታቸው ነው።

ኢትዮጵያ በግዙፍ ፕሮጀክቶች ላይ የያዘችው የልማት አቅጣጫ በታላቁ ሕዳሴ ግድብ ተጨባጭ ምሳሌ አግኝቷል።

ከዓመታት ምኞትና ጥረት በኋላ በምርቃቱ የተመለከተው ውጤት ትልልቅ ሀገራዊ ራዕዮች በትዕግሥት፣ በትጋትና በተከታታይ ሥራ ወደ እውነታ ሊለወጡ እንደሚችሉ አመላክቷል።

በዚህም ጉባ ላይ የተሰሙት ብስራቶች የነገዋን ኢትዮጵያ በዛሬ ውሳኔ፣ በዛሬ ዕቅድና በዛሬ ሥራ ለመገንባት የተያዘውን ራዕይ ያሳያሉ።

በአመለወርቅ ደምሰው