የጠቅላይ ሚኒስትሩ ስልታዊ አቅጣጫዎችና ሀገራዊ አንድምታቸው

አዲስ አበባ፣ መስከረም 26፣ 2019 (ኤፍ ኤም ሲ) የሕዝብ ተወካዮች ምክር ቤት 7ኛው የሥራ ዘመን መመስረቻ ጉባዔ ላይ ጠቅላይ ሚኒስትር ዐቢይ አሕመድ (ዶ/ር) በድጋሚ የኢትዮጵያ ጠቅላይ ሚኒስትር ሆነው ተሰይመዋል።

ጠቅላይ ሚኒስትሩ በወቅቱ ባስተላለፉት መልዕክት ይፋ ያደረጓቸው የቀጣይ አምስት ዓመታት ስልታዊ አቅጣጫዎች፣ ኢትዮጵያ በፖለቲካ፣ በኢኮኖሚ፣ በዲፕሎማሲና በደኅንነት ዘርፎች ልትከተለው ያሰበችውን አጠቃላይ የለውጥ መስመር አመላክቷል።

እነዚህ ስልታዊ ውሳኔዎች ለሀገሪቱ የረጅም ጊዜ ዕድገትና መረጋጋት ያላቸው ሀገራዊና ቀጣናዊ አንድምታዎች ሰፊ ናቸው።

የፖለቲካ መረጋጋት እና የሕግ-መንግሥት ማሻሻያ፡

በሀገሪቱ ዘላቂ ሰላም ለማስፈን የሕገ-መንግሥት ማሻሻያ ለማድረግ የተያዘው ዕቅድ፣ ለዓመታት ሲያጋጥሙ የቆዩ ስልታዊ የፖለቲካ ቅሬታዎችንና አለመግባባቶችን በመሠረታዊነት ለመፍታት ያለመ ነው።

ይህም አካታች የሆነ የሕገ-መንግሥት ማሻሻያ መደረጉ የብሔራዊ ምክክር ሒደቱን ውጤታማነት ከማሳደጉ ባሻገር፣ ተቋማዊ ዴሞክራሲን ለማጠናከር እና የሕግ የበላይነትን ለማስፈን መንገድ ይጠርጋል።

ዲፕሎማሲ፣ የባሕር በር እና የጂኦ-ፖለቲካ ሚዛን፡

ኢትዮጵያ የባሕር በርና የወደብ ተደራሽነትን በዲፕሎማሲያዊ መንገድ ለማረጋገጥ የያዘችው አቋም፣ ከጠንካራ የመከላከያና የፀጥታ አቅም ግንባታ ጋር ተጣጥሞ ቀርቧል።

ይህም በቀይ ባሕርና በአፍሪካ ቀንድ አካባቢ እየተለወጠ የመጣውን የጂኦ-ፖለቲካዊ ውጥረት ግምት ውስጥ በማስገባት፣ የሀገሪቱን ኢኮኖሚያዊ ደኅንነት ማስጠበቅ ያስችላል። ለንግግርና ለዲፕሎማሲ ቅድሚያ መስጠቷ ደግሞ ከጎረቤት ሀገራት ጋር በቀጣናዊ ትስስርና የጋራ ዕድገት ላይ የተመሠረተ ወዳጅነት እንዲጠናከር ያደርጋል።

የማክሮኢኮኖሚ ማሻሻያ እና የምግብ ሉዓላዊነት፡

የተጀመሩ ሁለንተናዊ የማክሮኢኮኖሚ ማሻሻያዎችን ማጠናቀቅ እና የግብርና ምርታማነትን (እንደ የበጋ ስንዴ ልማት ያሉ) ማሳደግ ትኩረት ተሰጥቷቸዋል።

ይህም የማክሮኢኮኖሚ ማሻሻያው የውጭ ኢንቨስትመንት ሳቢነትን በመጨመር እና የገበያ መረጋጋትን በመፍጠር ረገድ ከፍተኛ አስተዋጽኦ ይኖረዋል።

በተመሳሳይ የምግብ ሉዓላዊነትን ማረጋገጥ ሀገሪቱ በምግብ እርዳታ ላይ ያላትን ጥገኝነት በመቀነስ የምግብ ዋስትናዋን በዘላቂነት እንድታረጋግጥ ያስችላታል።

ዘመናዊ የከተማ ልማት፣ ዲጂታላይዜሽን እና መልካም አስተዳደር፡

የኮሪደር ልማት፣ የወንዝ ዳር ፕሮጀክቶች፣ ብሔራዊ የዲጂታል መታወቂያ አቅርቦት እና በሙስና ላይ የሚደረግ ጠንካራ ትግል የልማቱ አካል ናቸው።

ይህም የከተሞች ዘመናዊነት የዜጎችን የአኗኗር ዘይቤ የሚያሻሽል ሲሆን÷ የዲጂታል መታወቂያ ዝርጋታ ደግሞ የአገልግሎት አሰጣጥን በማቀላጠፍና ግልጽነትን በመፍጠር የሙስና እድሎችን ያጠብባል። በሙስና ላይ የሚወሰድ የማያወላውል ርምጃ የመንግሥትን የሀብት ብክነት በመቀነስ የሕዝብ አመኔታን ይገነባል።

ብሔራዊ አንድነት እና የፖለቲካ ምህዳር፡

ከተፎካካሪ ፓርቲዎች ጋር ለሀገር ጥቅም በጋራ የመሥራትና አብሮነትን የማጠናከርና እና አካታችነትን የማጎልበት ጉዳይ ትኩረት ይሰጠዋል።

ይህም የጋራ ሀገራዊ አጀንዳዎችና ብሔራዊ ጥቅምን ማስከበር ላይ ትብብር ማድረግ የፖለቲካ ምህዳሩን ወደ ገንቢ ውይይት ይለውጠዋል።

በዚህም ሀገሪቱ የሚያጋጥሟትን የውስጥና የውጭ ፈተናዎች በጋራና በወንድማማችነት ለመሻገር የሚያስችል ጠንካራ ማህበራዊ መሰረት ይፈጥራል።

እነዚህ በጠቅላይ ሚኒስትሩ ይፋ የተደረጉ ስልታዊ አቅጣጫዎች፣ ኢትዮጵያ በጠንካራ የኢኮኖሚና የደኅንነት መዋቅር ላይ የተገነባች፣ በቀጣናው ተፅዕኖ ፈጣሪ የሆነች እና የውስጥ ችግሮችን በሕገ መንግሥታዊና ዴሞክራሲያዊ መንገድ የምትፈታ ሀገር ሆና እንድትቀጥል ያለሙ ናቸው።

#የመደመር_መንግሥት

በታሪኩ ለገሰ