በትግራይ ክልል የፊታችን ጥቅምት 16 ትምህርት ይጀመራል

አዲስ አበባ፣ ጥቅምት 12፣ 2019 (ኤፍ ኤም ሲ) በትግራይ ክልል የፊታችን ጥቅምት 16 ቀን 2019 ዓ.ም የመማር ማስተማር ሒደት ይጀመራል አለ የክልሉ ትምህርት ቢሮ።

የትግራይ ክልል ባለአደራ አስተዳደር አስፈጻሚ ሥራ ኃላፊዎች በመቐለ ከተማ የሚገኘውን አፄ ዮሐንስ አጠቃላይ ሁለተኛ ደረጃ ትምህርት ቤት ጎብኝተዋል።

የጉብኝቱ ዓላማ በትምህርት ቤቱ ያለውን ሁኔታ ለመመልከትና መደበኛውን የመማር ማስተማር ሥራ ለማስጀመር የተደረጉ ዝግጅቶችን ለመገምገም ነው።

አስፈጻሚ ሥራ ኃላፊዎቹ ከመምህራን እና ከትምህርት ቤት አስተዳደር አካላት ጋር በተለያዩ ጉዳዮች ተወያይተው አቅጣጫ አስቀምጠዋል።

በዚህ ወቅትም መምህራንና ወላጆች የትምህርት ሥራው በስኬት እንዲቀጥል የበኩላቸውን ሚና እንዲወጡ ጥሪ አቅርበዋል።

የትምህርት ሒደቱ እንደገና መጀመሩ ተማሪዎች ወደ ትምህርት ገበታቸው እንዲመለሱና በጉዳት ምክንያት የተቋረጠው የትምህርት አገልግሎት እንዲቀጥል ድጋፍ እንደሚደረግ ተገልጿል።

መምህራን ተማሪዎችን በተገቢው ሁኔታ ለመቀበልና የትምህርት ሥራውን ለማስቀጠል፣ ወላጆች ልጆቻቸውን ወደ ትምህርት ገበታ በመመለስ የትምህርት ሥራውን መደገፍ እንዳለባቸው አስገንዝበዋል።

የትግራይ ትምህርት ቢሮ ሁሉም ትምህርት ቤቶች ዝግጅታቸውን አጠናቅቀው ከሰኞ ጥቅምት 16 ቀን 2019 ዓ.ም ጀምሮ መደበኛውን የመማር ማስተማር ሥራ እንደሚጀምሩ አስታውቋል።

ቢሮው መምህራንና ተማሪዎች ዝግጅታቸውን በማጠናቀቅ በተመደቡባቸው ትምህርት ቤቶች በመገኘት ትምህርት ለመጀመር ዝግጁ እንዲሆኑ ጥሪ አቅርቧል።