Finfinnee, Ebla 23, 2017(FMC) – Af-yaa’iin Mana Maree Federeeshinii Aganyahu Tashaagar guyyaa Poolisii Itiyoophiyaa 116ffaa sababeeffachuun agarsiisaa fi siimpooziyamii Godambaa Saayinsiitti qophaa’e bananiiru.
Siimpooziyeemii fi agarsiisni kun bara 1901 hanga 2017tti mata duree ‘Pooliisii jijjiirame, biyya jijiiramaa jirtuuf’ jedhuun kan qophaa’ee dha.
Saganticharratti Af-yaa’iin Mana Maree Federeeshinii Aganyahu Tashaagar, Komishinarri Jeneraalaa Poolisii Federaalaa Itiyoophiyaa Dammallaash Gabiramikaa’eel, Qondaaltonni Olaanoo Raayyaa Ittisaa fi Poolisii Federaalaa, goototni duraanii fi keessummoonni afeeraman argamaniiru.
Ayyaanichi Ebla 23, 2017 irraa eegalee hanga Ebla 25, 2017tti siimpooziyeemii fi agarsiisawwan seenaa dhufaatii Poolisii Itiyoophiyaa fi milkaa’inoota rifoormii poolisii galmaa’an mul’isaniin kan kabajamu ta’uu TOI gabaaseera.