Finfinnee, Caamsaa 17, 2017 (FMC) – Taphoonni Piriimeer Liigii Ingiliiz bara 2024/25 har’a xumura argateera.
Hanga torbee 38ffaatti hirmaannaa Shaampiyoonsi Liigii Awuroophaa argachuuf kilaboonni 4 morkachaa kan turan yoo ta’u, dhumarratti Cheelsii, Maanchiister Siitii fi Niwuukaasiil milkaa’aniiru.
Maanchiister Siitiin galchii 2 fi 0n Fuulhaam, Cheelsiin ammoo galchii 1 fi 0n Nootingahaam Forest yoo injifatan, morkattoota cimoo kan turan Astoon Viilaan Maachiister Yuunaayitiidiin, Niwuukaasiil ammoo Eevartaniin injifatamaniiru.
Haaluma kanaan Liiverpuul, Arsenaal, Maachiister Siitii, Cheelsii, Niwuukaasilii fi Tootenhaam kilaboota Ingiliiz hirmaannaa Shaampiyoonsi Liigii Awurooppaa argataniidha.
Astoon Viilaan hirmaannaa Liigii Awurooppaa, Nootingahaam Foresti ammoo Konfiraansi Liigii argataniiru.
Saawuus Hampitan, Ipisiiwiich Taawonii fi Leester Siitiin kilaboota gara Shaampiyoon Shiippiitti gad bu’an yoo ta’an, Sandarlaandi, Barnileeyii fi Liidis Yuunaayitiid ammoo kilaboota gara Piriimeer Liigiitti ol guddataniidha.
Tootenhaam ammoo kilaba gabatee Piriimeer Liigiin sadarkaa 17ffaarra osoo jiruu Liigii Awurooppaa injifachuun hirmaannaa Shaampiyoonsi Liigii Awurooppaa argateedha.
#Oromia #Ethiopia