Finfinnee, Hagayya 6, 2017(FMC) – Magaalonni Afrikaa rakkoo jijjiirama qabeenya qilleensaa gara carraatti jijjiiruun jiraattota fayyadamoo taasisaa jiru.
Koreen qophii Yaa’ii Jijjiirama Qilleensaa Afrikaa 2ffaa Qaammee 3-5, 2017 qopheessummaa Itiyoophiyaan gaggeeffamuu odeeffannoo baaseen, Finfinnee dabalatee magaalonni biyyoota Afrikaa biroon hojiilee dhiibbaa jijjiirama qabeenya qilleensaa dandamachuu dandeessisan hojjechaa jiraachuu ifoomse.
Misoomni kooriidarii magaalaa Finfinnee haala qilleensa naannawaan walsimuun hojjetamaa akka jiru ibse.
Misooma kooriidarii dabalataan sagantaa balfa irra deebiin fayyidaarra oolchuun hojiin magaalicha qulqulluufi jireenyaaf mijataa taasisuu hojjetamaa jiraachuu eereera.
Bifuma walfakkaatuun Seeneegaal magaalaa Daakaaritti Awutoobisii humna aduun hojjetu, Ruwaandaa magaalaa Kiigaaliitti hojiin seera gamoowwanii magariisaa dhiibbaa jijjiirama qabeenya qilleensaa dandamachuuf gahee isaanii bahachaa jiraachuu hubachiiseera.
Afrikaatti tattaaffiin dhiibbaa jijjiirama qilleensaa dandamachuuf taasifamuu fi yaaddoowwan gara carraatti jijjiiruu yaa’ii kanarratti dhiyaachuun barnoonni kan irraa fudhatamu ta’uus ibseera.
Itiyoophiyaan ashaaraa magariisaan, itti fayyadama anniisaa haaromfamaafi milkaa’inoota dameewwan biroorratti galmeessiste yaa’icharratti dhiyeesssuuf qophii xumurteetti.
Biyyoonni Afrikaa biroonis hojiilee damichaan hojjetaniifi yaadota furmaataa ni dhiyeessuun eegama.
Yaa’ichi wayita xumuramu Afrikaanonni jijjiirama qabeenya qilleensaa irratti waliigaluun ejjennoo waloo baafachuun Yaa’ii jijjiirama qilleensaa addunyaa( COP30) baatii Sadaasaa dhufu gaggeeffamurratti ejjennoo ardichaa qabatanii ni dhiyaatu.
Soosinnaa Alamaayyehun.
#Oromia #Ethiopia
Odeeffannoowwan waqtaawaa dabalataa argachuuf;
Teelegiraama t.me/afanoromofana
Yuutiyuubii Afaan Oromo: www.youtube.com/@fmcafaanoromoo
Marsariitii www.fanamc.com/afaanoromoo
Tiwiitara https://twitter.com/fanatelevision
Feesbuukii: FMC Afaan Oromoo
Tiktok https://www.tiktok.com/@fana_afaan_oromoo
Yeroo maraa nu waliin waan taataniif isin galateeffanna.