Finfinnee, Caamsaa 4, 2017 (FMC) – Qabeenya Ji’ootuurizimii fi Ji’oopaarki misoomsuuf xiyyeeffannoon hojjetamaa jiraachuu Ministirri Ministeera Tuurizimii Salaamaawit Kaasaan ibsan.
Woorkishooppii Ji’ootuurizimiifi Ji’oopaarki guyyaa har’aa gaggeeffame ilaalchisuun Salaamaawit Kaasaan Faanaa Diijitaaliif akka ibsanitti, waltajjichi ji’ootuurizimiifi ji’oopaarkii Itiyoophiyaafi naannawaa Baha Afrikaa irratti hubannoo jiru kan cimsu ta’uu eeraniiru.
Biyyoota Mootummoota Gamtoomaniitti Dhaabbata Barnoota, Saayinsiifi Aadaa( UNESCO)’tti ji’oopaarkota isaanii galmeessisan 50 keessaa biyyoonni Afrikaa 2 qofaa ta’uu kaasanii, kunis qabeenyi ji’ootuurizimiifi ji’oopaarkii ardichaa hanga misoomuu qabu akka hin misoomne agarsiisa jedhan.
Biyyoota lameen keessaa tokko Itiyoophiyaa ta’uu kan ibsan Salaamaawit, hambaaleen kiliyyaa hin taane 12, hambaaleen kiliyyaa 6fi naannawaaleen eegaman 5 ta’uu himaniiru.
Afrikaatti ji’ootuurizimiifi ji’oopaarkonni gara qabeenyaatti jijjiiramuu dhabuuf sababoonni hanqina hubannoo, qindoominaafi hojiileen ijaarsa dandeettii sadarkaa barbaadamuun hojjetamuu dhabuu akka ta’es kaasaniiru.
Damee tuurizimiif xiyyeeffannoon kennamuun ji’ootuurizimii qorachuuf, misoomsuufi beeksisuuf carraa gaarii akka uumu eeraniiru.
Yeroo dhiyootti wixineen imaammataa tuurizimii akka ragga’u ibsuun, imaammatichi qabeenya ji’ootuurizimii eeguuf, ji’oopaarkota hundeessuufi hubannoo uumuun hojiilee akka saffisiisuu hubachiisaniiru.
Miikiyaas Ayyalaan.