Rakaakay caddoh Anxaxin raatih taddeerak Qimbisis taddeera Gabbi rasul Akkele.
Addis Ababa,Waysu 9,2018 (FMC) Qafar rakaakayih caddol Anxaxin raatih taddeerak Qimbisis taddeera Gabbi rasul akkele.
Baaxoh Caddol 8toh addah gexsitah yan anxaxin raatih taddeerah ( GREEN LEGACY ) Naharsi malaak Massakaxxa le Dr Abiyi Acmad elle geytimak Qimbisis taama kimaalih ayro Bishoftuh magaalal gexsitem tamixxigeh.
Toh tonnal anuk Qafar rakaakayak Naharsi saqal Massakaxxa le Cajji Awwal Qarba yeceh yan afkanak ugutak, Qafar rakaakayih caddol gexsitu waah yan anxaxin raatih ( GREEN LEGACY) taddeerak Qimbisis taama takkuh yaakume bicih afkanak ugut abak gulgulussô taamoomi gaba kalteh geytimta.
Tonna kinnuk, Massakaxxa le Cajji Awwal Qarba baaxô caddol 8toh addah gexisnu wayna anxaxin raatih taddeerah baxsa le hangi acayuk kulli rasu kee daqortiiy, magaalol xiinissô caddol ciggilta 10 ayroorah addat Qimbisis akah yakke innah afkan yece.
Masaakaxxa le Cajji Awel Qarba Qagitak iyyeemih, Qafar ayyunti Maaqiddi caabik is duudu kee tonnah ni baaxo leh tan Niqna cubbit haak, daabisnah nan coox Yankamme coox kee Silaalô cooxuh baxsa le hangi nacem faxximtam kassiise.
Baxsa luk Yankamme coox Qidaddo kee maaqiddi caabi ninnik gablusnuh, Yankamme coox daabisnam kee tonnah mano faxxah tan hawâ milaaguh yakkeh yan silaalo coox daabisnu faxximtam kassiisak rakaakay caddol Anxaxin raatih taddeerak Qimbisis taddeera Gabbi rasih caddol gexsite lem qaddowte.
Tonnah Qafar rakaakayak buqre kee Ginô Gaddih daddoosih biirok Naharsi saqal Injineer Yaasin Qali Qusbaan iyyeemih Anxaxin raatih taddeerah yakkeh yan bicah biirô Caddol qokol mihratleela daqorti fanah ruubeenih yaniinim kee Rasu kee daqorti caddol faxxiimah yan mihrat kee ahat axaw le Cogdâ qokol abe loonum baxxaqise.
Injineer Yaasin Qali Qagitak iyyeemih A taddeera Qaxa meqe innal gexsituh kulli rasu kee daqorti caddol Anxaxin raatih daabissoh Qimbisiyyi taamah baxsa le hangi acayuk, coox yaydarreenimiiy, yeyderren coox dariifâ caalat barsaanamaay, coox edde daabisan boodad cotooy, Caxa yafqen lee kee daabisah yan sehdayti caylaay, tonnah a taddeerat yangalu waa gabat agleytit gulgulussoh baxsa le hangi acayuk taamitnam faxximtam kassiisenim Rakakayak Doolat Anagaarawih Biiro Oyti Yascasse