Ameerika Iraanat Nammay Heele Maysattaka Abte

Addis Ababa,Diteli 2,2018 (FMC) Ameerikah Pirezdantih Yan Doonald Tiramp Iraan Lih Abeh Yan Gira Sooloh Sittin Gey Gaba Kaleh Yanim Qaddooseek Lakal Washingiton Iraanal 2hele Maysattaka Abtem Tiysixxige.

Tama Maysattaka Ameerika 80 Daga Takke Qilaama Abtem Tescessem Kee Iraan Iskabuk Takkem Digir Hinna Maysattaka Net Abah Tibba Manna Axcuk Maabitina Tatrusse.

Iraaan Itleenih Hormoz Tabeenak Tanak Sugte Sidoc Takke Tellemmo Doonikittet Maysattaka Abte Iyyanam Ameerikak Qaskariyyoh Cayli 65 Huuri Edde Finqitte Maysattaka Abeenih Sugen.

Tahran Isi Kabuk Tama Maysattakak Masquuliyat Bewaytem Takkay Ikkah Washingiton Raddi Cayuk Bahrain, Kuweet Kee Qatar Baaxoh Addal Geytimta Ameerikah Qaskar Fanteenal Maysattaka Abak Geytimta.

Toh tonnal anuk,Ameerikak Fanti Amrih Centcom, Tatre Bar Pirezdanti Yece Amrik Ugut Abak, 90 Takke Hadaf Akah Yibbixen Innah Abeenim Yiysixxigen.

Iraanak Qaafiyat Malaakih Afak Yaabeynah Yan Cuseen Kermanpur Elle Qaddosennal, 2 Bar Gideh Tekkeh Tan Maysattakat 14 Num Edde Rabem Kee 78 Num Edde Biyakittem Qaddoose.

Iraan Isikabuk Intemihi :- Bar Inki Tanuuk Iraan Rubta Qaran Maysattakak Gexxamah Bacreenil Geytimta Ameerikak Siragle Lee Elle Kobxisan Fanteena Tuxxiqik Iro Edde Abeenim Baxxaqsen.

Namma Baaxoh Fanal Gexsitak Geytima Carbi Baad Caddol Siragle Lee Liimo Fayya Haak Geytimam Kee Carbi Qimbisem Kee Namma Barih Addat Limo Booluk 5 Gaba Osisseh Geytimtam Kassisen.