Qafar Rakaakayak kabxa kee Qadaaga daddosih Biiro sansi qulmeenaanil taamitta kabxa abeenitih tucubbus kee hangissoh aydakaakan Yecen
Addis Ababa,Kaxxa Garabluk 4,2019 (FMC) Qafar Rakaakayak kabxa kee Qadaaga daddosih Biiro sansi murtitteh xayyoosuuy, qadaaga kee lowsis abbimoosih kukta kee miracsental sansi qulmeenaanil taamitta kabxa abeenitih tucubbus kee hangissoh aydakaakan asaaku samara magaalal gexisen.
Ta aydakaakan yaabal fakeh yan Rakaakayak kabxa kee Qadaaga daddosih Biirok saqalah yan gifta Awwal Qabdu a aydakaakanak hadaf sansi qulmeenaanil takkeh tan taamoomi gita yaysibixoonuh qulmeenaanil taamitta taama abeenit baaxo caddol tewqeh tan abbinos kukta kee miracsentak duddale ixxiga geyak siirataak ugutak taamitoonu kinnim qaddoosen.
Baadal away tan taqabitteek gexxaamah sansil amballayuk tamaate dagna meqe saamih korsitak sansil taamitta kabxaaba taffaafol katassah tan taqabitte raaqisoonuh yewqeh yan kukta kee miracsental taamitaanam abbinoosak sansi qulimih gexsit missoosaanamal maaqatta beyoonuh naharal sansi quleenit miracsentak adda barisaanam takku wayta taamah gita fiiriselem Yescessen.
Ta aydakaakanih addalaay sansi qulimih gexsit missoowuh Biiro maca akak wagittaah taffaafok maca faxximtam kee sansi quleenitik qambaalimtam maca kinniimik nagay addaffaknu abeenim yiysixxige.
Tahamfan sugeh yan taqabiy yanfdihoonuh akak macalaanakaay Taffaafo ceele waynan gital sansi gorrissaamaay Sansi quleenit canka fayxiik ugutak ceele wayta limo edde abtaamaay
Ceela ayfaf edde geytimewaak doolatal taqabi akah ugutannah abaanamih caalootay sugteh tani akah massowtannah faxxiima lowsis kee kattaatih maaqatta diggaluk beeloonum qaddoose.
Baaxo caddol doolat abteh tan macalaak gexxaamah sugteh tan taqabittek Away mangom massowtam takkay immay uxuh raqtaamal Kontrobanxil celta maaqatta beyoonuh naharal ken barisaanam dirki kinnim qaddosaak annah tan aydakaakanitte
Akket taadiyem hinnay foocaffanah wagsiisa dagaralkih akak walalak baarisak addah oobiseloonum yiysixxige.
Ta aydakaakanat tengeleh tan sansi qulmeenaanil taamitta maritteey akak garcitak sugeenimiiy gita akkaluk edde taamitak sugen gita maliino kee dagoomuk abluk sugen taqabitte kaxxa calway katassam akak bariteenim kee foocaffanah sugte taqabittek massoowak siirataak ugutak taamitoonu waanah yaniinim qaddoosen.
Kalifa Kadir