ዶክተር ሙላቱ ከታላቁ የህዳሴ ግድብ ጋር በተያያዘ የኢትዮጵያን አቋም የሚያስረዳ መልዕክት ለአውሮፓ ህብረት መሪዎች እና ለፈረንሳዩ ፕሬዚዳንት አደረሱ

እንዲሁም ለፈረንሳዩ ፕሬዚዳንት የተላከውን መልዕክት ለፕሬዚዳንቱ የአፍሪካ ጉዳዮች አማካሪ ፍራንክ ፓሪስ ማድረሳቸው ነው የተነገረው።

ዶክተር ሙላቱ ከአውሮፓ ህብረት ኮሚሽን እና ከፈረንሳይ ከፍተኛ ባለስልጣናት ጋር በነበራቸው ቆይታ ከግብፅና ሱዳን ጋር እየተካሄደ በሚገኘው ድርድር ኢትዮጵያ ሁሉንም አሸናፊ የሚያደርግ መፍትሄ ለማምጣት ዝግጁ መሆኗን ተናግረዋል።

ኢትዮጵያ የከፋ ጉዳትን የሚያስከትል ሳይሆን ምክንያታዊ እና ተመጣጣኝ የውሃ አጠቃቀም መርህን እንደምትከተልም አስረድተዋል።

ኢትዮጵያ ከግብጽ እና ከሱዳን ጋር በፈረንጆቹ 2015 በደረሰችው የመርህ ስምምነት መሰረት ከግድቡ ግንባታ ጎን ለጎን በቅርቡ የመጀመሪያውን ውሃ በመሙላት ሀይል ለማመንጨት የሚያስችል አስፈላጊ ስራዎችን በማከናወን ላይ ትገኛለችም ብለዋል።

በተጨማሪም ኢትዮጵያ እየተካሄደ ከሚገኘው የሶስትዮሽ ውይይት እንዳልወጣች በማስረዳት በሀገር ውስጥ ተጨማሪ ውይይቶችን ለማድረግ ለሶስቱ ሀገራት ተጨማሪ ጊዜ መጠየቋን ነው ያስረዱት።