የኢትዮጵያ አየር መንገድ አቪዬሽን አካዳሚ ወደ ዩኒቨርሲቲነት አደገ

አዲስ አበባ፣ የካቲት 27፣ 2015 (ኤፍ ቢ ሲ)የኢትዮጵያ ዓየር መንገድ በባለቤትነት የሚያስተዳድረው የኢትዮጵያ አቪየሽን አካዳሚ ወደ ዩኒቨርሲቲነት ማደጉ ተገለጸ፡፡

ዩኒቨርሲቲው በ”ኤሮስፔስ” እና በመስተንግዶ መርሐ-ግብሮች የምረቃ እና የድኅረ-ምረቃ ፕሮግራሞችን መጀመሩም ከአቪየሽኑ ያገኘነው መረጃ ያመላክታል፡፡

የበረራ ማሠልጠኛ ትምህርት ቤቱ በዕድሜ አንጋፋ እና ግዙፍ መሆኑ ይታወቃል፡፡

የኢትዮጵያ አየር መንገድ በባለቤትነት የሚያስተዳድረው አቪዬሽን አካዳሚው ÷ የአብራሪነት፣ የአውሮፕላን ጥገና ፣ የካቢን ቡድን፣ የጉዞ ቲኬት ሽያጭ እና አገልግሎት እንዲሁም ሌሎች ሥልጠናዎችን ሲሰጥ ቆይቷልም ነው የተባለው።

የአቪየሽን ትምህርት ቤቱ ወደ ዩኒቨርሲቲነት ካደገ በኋላ በዲግሪ መርሐ-ግብሮች ÷ በኤሮኖቲካል ምኅንድሥና ፣ በአውሮፕላን ጥገና ምኅንድሥና እንዲሁም በበረራ አስተዳደር በባችለር ሣይንስ የትምህርት መርሐ-ግብር ሲያሰለጥን ቆይቷል፡፡

በቱሪዝም እና መስተንግዶ አስተዳደር ዘርፎች ደግሞ በአርት ባችለር ዲግሪ የትምህርት መርሐ-ግብር ሲያሰለጥን ቆይቷል፡፡

በተጨማሪም በአቪየሽን አስተዳደር የማኔጅመንት ኦቭ ቢዝነስ አድሚንስትሬሽን ዲግሪ ትምህርት ሲሰጥ መቆየቱም ነው የተመለከተው፡፡