43ኛው የአፍሪካ ህብረት የስራ አስፈጻሚ ምክር ቤት መደበኛ ጉባዔ በናይሮቢ እየተካሄደ ነው

በጉባዔው በምክትል ጠቅላይ ሚኒስትር እና በውጭ ጉዳይ ሚኒስትር አቶ ደመቀ የተመራ ከፍተኛ የልኡካን ቡድን እየተሳተፈ ነው።

የኬንያ የውጭ ጉዳይና የዲያስፖራ ጉዳዮች ሚኒስትር አልፍሬድ ሙቱዋ(ዶ/ር) የስራ አስፈፃሚ ስብሰባውን በንግግራቸው ሲከፍቱ እንዳሉት ፥ አፍሪካ በተፈጥሮ ሀብቶች የበለፀገች ብትሆንም በልማት ብዙ የሚቀሩ ጉዳዮች እንዳሉ ጠቅሰዋል ።

በመሆኑም የአፍሪካ ሀገራት ውህደታቸውን ለማፋጠን በሰዎችና በሸቀጦች ላይ ያላቸውን የእንቅስቃሴ ገደብ እንዲያነሱ የጠየቁ ሲሆን ፥ ኬንያ ለአፍሪካውያን የቪዛ ጉዳይን በሂደት ለማስወገድ ዝግጁ መሆኗን አስታውቀዋል።

የኮሞሮስ የውጭ ጉዳይና ዓለም አቀፍ ትብብር ሚኒስትር እና የወቅቱ የስራ አስፈፃሚ ምክር ቤት ሊቀመንበር ዶሂር ዱልቃማል በበኩላቸው ፥ የአፍሪካ አኅጉራዊ ነፃ የንግድ ቀጠና ስምምነት ሙሉ በሙሉ ተግባራዊ መደረጉ ለአፍሪካ ኢኮኖሚያዊ ውህደት ጠቃሚ ነው ብለዋል።

ስብስባው የሚደረገው “የአፍሪካ አህጉራዊ ነጻ የንግድ ቀጣና ትግበራን ማፋጠን” በሚል መሪ ሃሳብ መሆኑን ከውጭ ጉዳይ ሚኒስቴር ያገኘነው መረጃ ያመለክታል ።