ቲቦር ናዢ የኢትዮጵያ አየር መንገድ በዓለም ካሉ ምርጥ አየር መንገዶች አንዱ ነው ሲሉ ገለጹ

አዲስ አበባ፣ ሰኔ 17፣ 2016 (ኤፍ ቢ ሲ) የቀድሞው የአሜሪካ የውጭ ጉዳይ ሚኒስቴር የአፍሪካ ጉዳዮች ረዳት ኃላፊ አምባሳደር ቲቦር ናዥ የኢትዮጵያ አየር መንገድ በዓለም ካሉ ምርጥ አየር መንገዶች አንዱና የእሳቸውም ቀዳሚ ምርጫ እንደሆነ ገለጹ፡፡

አምባሳደር ቲቦር ናዥ በማህበራዊ ትስስር ገፃቸው ባሰፈሩት መልእክት፤ የኢትዮጵያ አየር መንገድ በቅርቡ በአቪዬሽን ዩኒቨርሲቲው ላስመረቃቸው 800 ተመራቂዎች የእንኳን ደስ አላችሁ መልእክት አስተላልፈዋል።

በመልዕክታቸውም፤ አየር መንገዱን ብዙ ጊዜ መጎብኘታቸውን ጠቅሰው፤ በነበራቸው ተሞክሮም የአየር መንገዱ የሙያ ልህቀት የሚደነቅ መሆኑን ገልጸዋል።

ብዙ ተጨማሪ የበረራ ማስፋፊያ ስራዎችን ያከናውናል ብለው ተስፋ እንደሚያደርጉም ገልጸዋል፡፡

ለእኔ የኢትዮጵያ አየር መንገድ በዓለም ላይ ምርጡ አየር መንገድ ነው ሲሉም ጠቅሰዋል፡፡