በትብብር እና በዲፕሎማሲ ብቻ የሚረጋገጠው የናይል ውሃ ፍትሐዊ ተጠቃሚነት

አዲስ አበባ፣ ጥቅምት 9፣ 2018 (ኤፍ ኤም ሲ) የናይል ውሃ ፍትሐዊ ተጠቃሚነት የሚረጋገጠው በትብብር እና በዲፕሎማሲ ብቻ ነው አሉ በውጭ ጉዳይ ሚኒስቴር የአፍሪካ ጉዳዮች ዳይሬክተር አምባሳደር ዘሪሁን አበበ፡፡

አምባሳደር ዘሪሁን ለፋና ዲጂታል እንዳሉት÷ ታላቁ የኢትዮጵያ ሕዳሴ ግድቡ ከጅምሩ አንስቶ የዓባይ ወንዝ በቅኝ ግዛት ውል መሰረት እንዲተዳደር በሚፈልጉ አካላት ያልተቋረጠ የሀሰት መረጃ እና ክሶችን እያስተናገደ ይገኛል።

ለአብነትም በቅርቡ በሱዳን የተከሰተውን የጎርፍ አደጋ ከግድቡ ጋር ለማያያዝ የተደረገውን ከንቱ ጥረት አስታውሰዋል።

በዚህም ግብፅ በቀጥታ ኢትዮጵያን ለመወንጀል ያደረገችው ሙከራ በኢፌዴሪ ውሃና ኢነርጂ ሚኒስቴር በኩል ተገቢው ምላሽ የተሰጠበት መሆኑን አንስተዋል።

ኢትዮጵያ የዓባይ ወንዝ ላይ የጀመረችው ልማት የፍትሐዊ ተጠቃሚነት፣ የቀጣናዊ ትስስር እና የጋራ መልማት ርምጃ መሆኑን የገለጹት አምባሳደር ዘሪሁን፤ ከመሰረተ ቢስ ክስ መውጣት እንደሚገባ አስገንዝበዋል።

የናይል ወንዝ የቅኝ ግዛት ዘመን አስተሳሰብ እና ውል እኔ ብቻ ልጠቀም የሚል ያረጀ አስተሳሰብ መሆኑን በመግለጽ፤ ከዘመኑ ጋር አብሮ በመጓዝ ለጋራ ተጠቃሚነት መስራት ይሻላል ነው ያሉት።

በመሆኑም የናይል ውሃ ፍትሐዊነት የሚረጋገጠው በትብብር እና በዲፕሎማሲ በመሆኑ የሴራ እና የአግላይነት አካሄድ አያዋጣም ብለዋል።

ከኢትዮጵያ አልፎ የቀጣናውን ሀገራት በሀይል የሚያስተሳስረው የሕዳሴ ግድብ የናይል ቤተሰብን ትብብር የሚያጠናክር መሆኑን በመገንዘብ በዚህ ማዕቀፍ ውስጥ መግባት ብቸኛ አማራጭ እንደሆነ ጠቁመዋል።

በሚኪያስ አየለ