አዲስ አበባ የብዝኃነትና ውበት መገለጫ ናት – ከንቲባ አዳነች አቤቤ

አዲስ አበባ፣ ሕዳር 20፣ 2018 (ኤፍ ኤም ሲ) በአዲስ አበባ ከተማ እየተከበረ የሚገኘው 20ኛው የብሔሮች፣ ብሔረሰቦችና ህዝቦች ቀን ማጠቃለያ መድረክ እየተካሄደ ነው።

በመድረኩ የህዝብ ተወካዮች ምክር ቤት ምክትል አፈ ጉባዔ ሎሚ በዶ፣ የፌደሬሽን ምክር ቤት አፈ ጉባዔ አገኘው ተሻገር፣ የክልል ምክር ቤት አፈ ጉባዔዎች፣ የአዲስ አበባ ከተማ ከንቲባ አዳነች አቤቤ፣ የሃይማኖት አባቶች፣ አባ ገዳዎች፣ ሀደ ሲንቄዎችና የከተማዋ ነዋሪዎች ተገኝተዋል።

ከንቲባ አዳነች አቤቤ በዚህ ወቅት ባስተላለፉት መልዕክት÷ አዲስ አበባ የብዝኃነትና ውበት መገለጫ እንዲሁም ሁላችንም በአንድነት እየገነባናት የምትገኝ ከተማ ናት ብለዋል።

የከተማዋ ልማት ሥራም ብዝኃነትን አክብሮ እኩል ተጠቃሚነትና ተሳትፎን ያረጋገጠ መሆኑን ገልጸው÷ ነዋሪውን እኩል ተጠቃሚ የሚያደርጉ ሥራዎች ተጠናክረው ይቀጥላሉ ሲሉም ተናግረዋል።

ሰላምና ብልጽግና የሰፈነባት ኢትዮጵያን መፍጠር የሁሉም ኃላፊነት መሆኑን ያነሱት ከንቲባዋ÷ ሰላማችንን እየጠበቅን እህትና ወንድማማችነታችንን እያጠነከርን ሀገራችንን ከፍ ልናደርግ ይገባል ብለዋል።

አፈ ጉባዔ ቡዜና አልቃድር በበኩላቸው መዲናዋ የሁሉም ብሔሮችና ብሔረሰቦች መኖሪያ መሆኗን አንስተው÷ የተሰሩ የልማት ስራዎች የእኩል የተጠቃሚነት ዕድልን የሰጠ ነው ብለዋል።

ቀኑ በአዲስ አበባ ከተማ ከሕዳር ወር መግቢያ ጀምሮ የእርስ በርስ ግንኙነትን በሚያጠናክሩ ሁነቶች፣ ንግድና ባዛር ፕሮግራሞች እንዲሁም በሌሎች ዝግጅቶች ሲከበር ቆይቷል።

የዘንድሮው የብሔሮች፣ ብሔረሰቦችና ህዝቦች ቀን “ዴሞክራሲያዊ መግባባት ለኅብረ ብሔራዊ አንድነት” በሚል መሪ ሐሳብ እየተከበረ ይገኛል።

በቅድስት አባተ