የብሔሮች፣ ብሔረሰቦችና ህዝቦች ቀን የኢትዮጵያን ኅብረ ብሔራዊ አንድነት ያጠናክራል – አፈ ጉባኤ አገኘሁ ተሻገር

አዲስ አበባ፣ ሕዳር 20፣ 2018 (ኤፍ ኤም ሲ) የፌዴሬሽን ምክር ቤት አፈ ጉባኤ አገኘሁ ተሻገር የብሔሮች፣ ብሔረሰቦችና ህዝቦች ቀን የኢትዮጵያን ኅብረ ብሔራዊ አንድነት ያጠናክራል አሉ፡፡

በአዲስ አበባ ከተማ የ20ኛው የብሔሮች፣ ብሔረሰቦችና ህዝቦች ቀን ከተማ አቀፍ የማጠቃለያ መርሐ ግብር በዛሬው ዕለት ተካሂዷል።

በዚሁ ወቅት አፈ ጉባኤ አገኘሁ ተሻገር እንዳሉት፥ በዓሉ ኢትዮጵያውያን እሴቶቻቸውን፣ ባህላቸውንና ልምዳቸውን የሚለዋወጡበት የኢትዮጵያ ቀን ነው።

የብሔሮች፣ ብሔረሰቦችና ህዝቦች ቀን የኢትዮጵያውያን ብዝኃነት የሚታይበት፣ ኅብረ ብሔራዊ ዲሞክራሲያዊ አንድነት የሚጠናከርበትና ለዘላቂ ሰላም፣ ለፈጣን ልማትና ኢኮኖሚ እድገት የሚወያዩበትና ቃል የሚገቡበት ቀን መሆኑንም ተናግረዋል።

የዘንድሮው በዓል ለሀገራዊ መግባባት ተግዳሮት የሆኑ ችግሮችን በውይይትና በምክክር በመፍታት ኅብረ ብሔራዊ አንድነታችንን ለማፅናት ተግባራዊ እንቅስቃሴ በጀመርንበት ወቅት የሚከበር ነው ብለዋል።

ኢትዮጵያ ብዝኃ ማንነት ካላቸው ሀገራት መካከል አንዷ መሆኗን ጠቅሰው፥ ባለፉት መንግስታት ብዝኃነትን በአግባቡ ከማስተናገድና ለኅብረ ብሔራዊ አንድነት ከመጠቀም አንጻር ጉድለቶች እንደነበሩ አንስተዋል።

ብዝኃነትን ለሀገራዊ አንድነትና ለብሔራዊ መግባባት ለማዋል መላው ኢትዮጵያውያን ትልቅ ሚና ሊጫወቱ ይገባል ማለታቸውን ኢዜአ ዘግቧል፡፡