አዲስ አበባ፣ ሕዳር 20፣ 2018 (ኤፍ ኤም ሲ) የኢትዮጵያ ከ17 ዓመት በታች ብሔራዊ ቡድን (ቀይ ቀበሮዎቹ) ከ22 አመት በኋላ ወደ አፍሪካ ዋንጫ ለመመለስ በነገው ዕለት ወሳኝ ጨዋታ ያደርጋሉ፡፡
ከ17 ዓመት በታች የአፍሪካ ዋንጫ የምስራቅና መካከለኛው አፍሪካ ዋንጫ (ሴካፋ) ማጣሪያ ውድድር ቀይ ቀበሮዎቹ ነገ 10 ሰዓት ላይ ከዩጋንዳ ብሄራዊ ቡድን ጋር ይጫወታሉ፡፡
በአሠልጣኝ ቤንጃሚን ዚመር የሚመራው አዳጊ ብሄራዊ ቡድኑ ከምድቡ በ10 ነጥብ ቀዳሚ ሆኖ ያጠናቀቀ ሲሆን፥ ወደ ፍፃሜ ለማለፍ በነገው ዕለት በአበበ ቢቂላ ስታዲየም የሚያደርገው ጨዋታ ይጠበቃል፡፡
የኢትዮጵያ ከ17 ዓመት በታች ብሔራዊ ቡድን የነገውን ወሳኝ ጨዋታ በድል የሚወጣ ከሆነ የፍፃሜ ተፋላሚ ከመሆኑ በላይ ከ22 ዓመታት በኋላ ወደ አፍሪካ ዋንጫ መመለሱን ያረጋግጣል ።
ነገ በአበበ ቢቂላ ስታዲየም የሚደረገው ተጠባቂ የግማሽ ፍፃሜ ጨዋታ በፋና ፕላስ የቴሌቪዥን ቻናል እንዲሁም በፋና ሚዲያ ኮርፖሬሽን የማኅበራዊ ሚዲያ አማራጮች በቀጥታ ይተላለፋል።
በሙባረክ ፋንታው