ለአንድ ወር በኮምቦልቻ፣ ደሴና አካባቢው በከፊል ተቋርጦ የቆየው ኃይል ወደ አገልግሎት ተመለሰ

Adimasu Aragawu

1 hour ago

አዲስ አበባ፣ ሕዳር 23፣ 2018 (ኤፍ ኤም ሲ) ለአንድ ወር በኮምቦልቻ፣ ደሴና አካባቢው በከፊል ተቋርጦ የቆየው የኤሌክትሪክ ኃይል ዳግም ወደ አገልግሎት ተመልሷል።

አገልግሎቱ የተቋረጠው በኮምቦልቻ አንድ ባለ132 ኪሎ ቮልት የኃይል ማከፋፊያ ጣቢያ ካሉት ሁለት ትራንስፎርመሮች መካከል በአንደኛው ላይ ባጋጠመ ችግር መሆኑን የኢትዮጵያ ኤሌክትሪክ ኃይል አስታውቋል።

‎40 ሜጋ ቮልት አምፒር ኃይል የመጫን አቅም ባለው ትራንስፎርመር ላይ ባጋጠመ የእሳት አደጋ ምክንያት በአካባቢው በከፊል ኤሌክትሪክ ኃይል ተቋርጦ መቆየቱንም ገልጿል፡፡

በዚህም በትራንስፎርመሩ ላይ በደረሰው ጉዳት በደሴና ኮምቦልቻ ከተሞች እንዲሁም በአካባቢያቸው ለአንድ ወር ያህል በከፊል ኃይል ተቋርጦ መቆየቱን አመላክቷል፡፡

ጉዳት የደረሰበትን ትራንስፎርመር ጠግኖ ዳግም አገልግሎት ለማስጀመር ከሪጅኑና ከማዕከል የተውጣጡ የጥገና ባለሙያዎች ሲሰሩ መቆየታቸውን ተቋሙ ለፋና ዲጂታል ገልጿል።

ተቋርጦ የቆየውን የኤሌክትሪክ ኃይል በዛሬው ዕለት ሙሉ በሙሉ መመለስ የተቻለ ሲሆን÷ በጥገና ሥራው ላይ ርብርብ ሲያደርጉ ለነበሩ ባለሙያዎች ምስጋና ቀርቧል።

ዘወትር፦ ከእኛ ጋር ስለሆኑ እናመሰግናለን!