የአማራ ክልል መንግሥት ለጤና መድሕን አገልግሎት 845 ሚሊየን ብር ድጎማ አደረገ

Adimasu Aragawu

7 hours ago

አዲስ አበባ፣ ታሕሣሥ 20፣ 2018 (ኤፍ ኤም ሲ) የአማራ ክልል መንግሥት ለጤና መድሕን አገልግሎት 845 ሚሊየን ብር ድጎማ አድርጓል አለ የክልሉ ጤና ቢሮ።

የቢሮው የጽ/ቤት ኃላፊ ክሽን ወልዴ በማሕበረሰብ ጤና መድሕን አባላት የሚነሳውን የመድኃኒት አቅርቦት ቅሬታ ለመፍታት የክልሉ መንግሥት 845 ሚሊየን ብር ድጎማ ማድረጉን ለፋና ሚዲያ ኮርፖሬሽን ተናግረዋል።

የማሕበረሰብ አቀፍ ጤና መድሕን አባላት በጤና ተቋማት በልዩ መስኮት አገልግሎት እያገኙ መሆናቸውን ገልጸው÷ የጤና ተቋማት የውስጥ ገቢያቸውን ለመድኃኒት ግዥ እንዲያውሉም አቅጣጫ ተሠጥቷል ብለዋል።

ባለፈው ዓመት ብቻ ከ12 ሚሊየን በላይ ዜጎች በጤና መድሕን አገልግሎት ህክምና ማግኘታቸውን ጠቁመው÷ ለዚህም ከ2 ነጥብ 6 ቢሊየን ብር በላይ ወጭ መደረጉን አመላክተዋል።

ህክምና ካገኙት ውስጥም 51 በመቶ ሴቶች መሆናቸውን ነው የገለጹት።

በተያዘው በጀት ዓመት የአባላት ምዝገባና እድሳት ከታሕሣሥ 1 ጀምሮ በማከናወን 4 ነጥብ 5 ሚሊየን አባላትን ለመመዝገብ ታቅዶ እየተሰራ መሆኑን ገልጸው÷ እስካሁን 1 ነጥብ 3 ሚሊየን ዜጎችን መመዝገብ ተችሏል ብለዋል።

በበላይነህ ዘላለም