የሎማ ሐይቅ ልዩ ውበት ሲዳሰስ

የአፋር ክልል በንቁ የእሳተ ገሞራ መልክዓ-ምድሮች፣ በጨው ክምችቶች እና እጅግ በጣም ዝቅተኛና ሞቃታማ በሆኑት የዳሎል ስፍራዎች በሰፊው ይታወቃል።

ሆኖም ግን፣ ከእነዚህ አስደናቂ የተፈጥሮ ክስተቶች ባሻገር፣ ክልሉ እጅግ ጸጥተኛ፣ ማራኪ እና የተለየ ውበት ያላቸው የተፈጥሮ የውኃ አካላት መገኛም ጭምር ነው።

ከእነዚህ መካከል በቅርቡ በስፋት እየተዋወቀ የሚገኘው የሎማ ሐይቅ አንደኛው ነው።

ሎማ የሚገኘው በአፋር ክልል ከሰመራ ከተማ በስተሰሜን ምዕራብ በግምት 21 ኪሎ ሜትር ርቀት ላይ ነው።

ሐይቁ ከባሕር ጠለል በላይ በ366.4 ሜትር ከፍታ ላይ ይገኛል።

ሙሉ በሙሉ ክብ ቅርጽ ያለው ይህ ሐይቅ ወደ 51 ሄክታር የሚጠጋ የቆዳ ስፋት ይሸፍናል።

የሎማ ሐይቅ የተፈጠረው ከምድር በታች በነበረ ኃይለኛ የእሳተ ገሞራ ፍንዳታ አማካኝነት ነው።

ፍንዳታው ካበቃ በኋላ የተፈጠረው ጥልቅ ጎድጓዳ ስፍራ በሂደት በውሃ በመሙላቱ ይህንን አስደናቂ ሐይቅ ሊያስገኝ ችሏል።

ሐይቁን ልዩ የሚያደርገው በዙሪያው ባሉት ደረቃማ፣ ጥቁር አለታማ እና አመድማ የእሳተ ገሞራ ቅሪት መልክዓ-ምድሮች መካከል ደምቆ የሚታይ መሆኑ ነው።

የውኃው ቀለም እንደ ፀሐይ ብርሃን እና እንደ ቀኑ ክፍለ ጊዜ ፈዘዝ ካለ ሰማያዊ ወደ ጥቁር አረንጓዴ ቀለም የመቀያየር ተፈጥሯዊ ባህሪ አለው።

ከሰመራ ከተማ ተነስቶ ወደ ስፍራው የሚደረገው ጉዞ የአፋርን የተለየ የመልክዓ-ምድር ውበት ለመቃኘት ለሚፈልጉ የውጭ ሀገርና የሀገር ውስጥ ጎብኚዎች ምቹ ነው።

የሐይቁ የጠራ ውኃ በዙሪያው ካሉት ደረቅ ገደላማ ድንጋዮች ጋር የሚፈጥረው ተቃርኖ ለተፈጥሮ ፎቶግራፍ አንሺዎች እጅግ ማራኪ እይታን ይለግሳል።

የሎማ ክሬተር ሐይቅ አፋር የሙቀት እና የደረቅ ምድር ብቻ ሳትሆን፣ አስደናቂ የውኃ አካላትና የሰላም ስፍራዎች መገኛ መሆኗን ማረጋገጫ ነው።

ይህ ስፍራ ተገቢው የመሠረተ-ልማት ግንባታ ከተከናወነለት በክልሉ ካሉት እንደ ዳሎል እና ኤርታሌ ካሉ ታዋቂ መዳረሻዎች ጎን ለጎን የኢትዮጵያን የቱሪዝም ገጽታ በእጅጉ ሊያሳድግ የሚችል ትልቅ አቅም አለው።