የወርቃማ ዘመን ጅማሮ የሆነው ሀገራዊ ምክክር

ትናንት በይፋ የተጀመረው ታላቁ ሀገራዊ የምክክር ጉባኤ፣ ሀገሪቱ ለዘመናት ከተሸከመችው ቁርሾና ግጭት ወጥታ ወደ አዲስ ብሩህ ምዕራፍ የምትሻገርበት የወርቃማ ዘመን ጅማሮ ነው፡፡

ይህ መድረክ ጠብመንጃን በሃሳብ የበላይነት ለመተካትና ጠንካራ ሀገረ መንግሥት ለመገንባት የተጣለ ታላቅ የትውልድ አደራ ነው።

ኢትዮጵያ ረጅም፣ ኩሩ እና ዘርፈ-ብዙ ታሪክ ያላት ሀገር ብትሆንም፣ በሂደት ውስጥ ግን በርካታ መዋቅራዊ የፖለቲካ አለመረጋጋቶችን፣ የታሪክ አረዳድ ልዩነቶችን እና የእርስ በእርስ ግጭቶችን አሳልፋለች።

ለዘመናት የሞከርነው ጦርነትና የኃይል አማራጭ ማሸነፍን እንጂ ዘላቂ ሰላምን ሊያመጣ አልቻለም።

ይሁን እንጂ፣ ትናንት ሐምሌ 8 ቀን 2018 ዓ.ም በአዲስ አበባ የተጀመረው ታላቁ ሀገራዊ ምክክር ጉባኤ፣ ኢትዮጵያውያን የጠብመንጃና የኃይል እሳቤን አስወግደው በሐሳብ የበላይነት የሚመሩበትን አዲስ ወርቃማ ዘመን ያበሰረ ክስተት ሆኗል።

በሀገራችን የፖለቲካ ባህል ውስጥ ልዩነትን እንደ ክህደት፣ ተፎካካሪን ደግሞ እንደ ጠላት የማየት አውዳሚ አባዜ ሰፍኖ ቆይቷል።

ይህ የሀገራዊ ምክክር ሂደት ግን ዜጎች በጠረጴዛ ዙሪያ በነፃነት እንዲደማመጡ ዕድል ፈጥሯል።

የሐሳብ የበላይነት መረጋገጥ የሰለጠነ የዴሞክራሲ መሠረት ከመሆኑም በላይ፣ ሀገሪቱ ወደ የማይናወጥ መረጋጋት የምታደርገው ጉዞ መጀመሪያ ነው።

ትናንት የተጀመረው ጉባኤ ታሪካዊ ቁስሎችን በሆደ-ሰፊነት ለመፈወስና የወደፊት የጋራ ትርክትን ለመቅረጽ የተገኘ ትልቅ የትውልድ ዕድል ነው።

የአሁኑ ምክክር የጥቂት የፖለቲካ ልሂቃን የድርድር መድረክ ሳይሆን፣ ከ1,195 በላይ ወረዳዎች የተውጣጡ ከ4,000 በላይ ተመካካሪዎች የተሳተፉበት ፍጹም ሕዝባዊ መሠረት ያለው መድረክ ነው።

ሴቶች፣ ወጣቶች፣ ማኅበራዊ ድርጅቶችና የሃይማኖት አባቶች የራሳቸውን አጀንዳ ይዘው ቀርበዋል። ማንም ሳይገለል ሁሉም ድምፁ እንዲሰማ መደረጉ ሂደቱ እውነተኛ የሕዝብ ይሁንታ እንዲኖረው አድርጎታል።

የሀገር ፅናት የሚለካው በወታደራዊ ኃይል ሳይሆን በዜጎች መካከል በሚኖር የጋራ መግባባት ጥልቀት ነው።

በምክክሩ ይፋ የተደረጉት ስምንቱ ዋና ዋና አጀንዳዎች በስኬት ከተመከረባቸው በኋላ የኢትዮጵያን ዘላቂ ሰላምና የጋራ ብልጽግና በጽኑ መሠረት ላይ ይገነባሉ።

የውስጥ ሰላም ሲረጋገጥ ደግሞ ሀገሪቱ ወደ ሁለንተናዊ የኢኮኖሚና ማኅበራዊ ዕድገት ማማ ላይ የምትወጣበት ወርቃማው ዘመን ይጀምራል።

የኢትዮጵያ ሀገራዊ ምክክር ጉባኤ ጅማሮ የረጅም መንገድ የመጀመሪያ እርምጃ ነው፤ የሀገሪቱን ዕጣ ፈንታ ለመቀየር ደግሞ የወርቃማ ዘመን ማብሰሪያ።

በትናንት ቂም ውስጥ ከመታጠር ይልቅ ለነገዋ የበለጸገች ሀገር ሲባል እያንዳንዱ ዜጋ፣ የፖለቲካ ኃይልና ምሁር ሂደቱን በባለቤትነት ሊደግፈውና ሊንከባከበው ይገባል።

ዛሬ በጠረጴዛ ዙሪያ የሚታየው ቅንነትና የሚወሰኑት ውሳኔዎች የነገዋን ጠንካራና የተባበረች ኢትዮጵያን ይወልዳሉ።