በአፋር ክልል ሦስተኛው ዙር የፅዱ ኢትዮጵያ ንቅናቄ ተጀመረ

አዲስ አበባ፣ ሐምሌ 19፣ 2018 (ኤፍ ኤም ሲ) ሦስተኛው ዙር ሀገር አቀፍ የፅዱ ኢትዮጵያ ንቅናቄ በአፋር ክልል በዛሬው ዕለት በይፋ ተጀምሯል፡፡

የኢትዮጵያ አካባቢ ጥበቃ ባለስልጣን ዋና ዳይሬክተር ለሊሴ ነሚ (ዶ/ር) በዚሁ ወቅት እንዳሉት፥ ባለፉት ሁለት ዓመታት በተከናወኑት ንቅናቄዎች ሰፊ ማህበረሰብ ጋር ተደራሽ መሆን ተችሏል፡፡

ለሦስት ወራት በሚቆየው በዚህ ንቅናቄ ላይ በፕላስቲኮች፣ ኬሚካሎችና የድምፅ ብክለትን መቀነስ ላይ ትኩረት መደረጉን ተናግረዋል፡፡

ልማቶች አካባቢን በማይበክል መልኩ መተግበር እንዳለባቸው የገለጹት ዋና ዳይሬክተሯ፥ ፅዱ ኢትዮጵያን ለትውልዱ ማስተላለፍ እንደሚገባ አስገንዝበዋል፡፡

በሌላ በኩል በባለስልጣን መስሪያ ቤቱና በኢትዮጵያ አርቲፊሻል ኢንተለጀንስ ኢኒስቲትዩት የለማ የአካባቢ ብክለት ዲጂታል ሪፖርት ማድረጊያ ስርዓት ተዋውቋል።

በመተግበሪያው አማካኝነት ማንኛውም ሰው በአካባቢ ብክለት እንዲሁም የኬሚካልና አደገኛ ቆሻሻ በተመለከተ ባለበት ሆኖ በቪዲዮ፣ ፎቶ እና ፅሁፍ ጥቆማ ማድረስ ይችላል።

መተግበሪያውን ከፕለይ እና አፕ ስቶር ላይ ማግኘት እንደሚቻል ተጠቁሟል፡፡

በፍቅርተ ከበደ