የኢትዮጵያ የማንሠራራት ዘመን አዲስ ምዕራፍ

“የምሥራቅ አፍሪካ የውሃ ማማ” እየተባለች በምድረ-በዳ ጥም የምትቃጠል፤ “የዓባይ ወንዝ ዋና ምንጭ” ሆና ሳለች በጨለማ የምትማቅቅ ሀገር ተብላም ትታወቅ ነበር።

ከዓባይ ውሃ 86 በመቶውን የምታበረክተው ኢትዮጵያ፣ ሃብቷን እንዳትጠቀም የተደረገችበት ጂኦ-ፖለቲካዊ ሴራ የኩስመናችን ዋና መገለጫ ሆኖ ለዘመናት ቆይቷል፡፡

ያዕቆብ አርሳኖ (ዶ/ር) በ2007 ዓ.ም ባሳተሙት ‘ኢትዮጵያና ናይል’ በተሰኘ መጽሐፋቸው እንዳስረዱት÷ በ1929 እና በ1959 የቅኝ ግዛት ውሎች የተነሳ ሀገራችን በገዛ ወንዟ የመጠቀም መብቷን ተነፍጋ በድህነት እንድትማቅቅ ተገድዳለች።

ይህንን የውሃ ጂኦ-ፖለቲካዊ ጫና በተመለከተ አሾክ ስዌይን (ፕ/ር) በታዋቂው ‘Hydrological Sciences Journal’ (Vol. 56, Issue 4) ጥናታቸው በግልጽ አስፍረውታል። በ20ኛው ክፍለ ዘመን ታችኞቹ የተፋሰሱ ሀገራት በነበራቸው ነጠላ የበላይነት የላይኞቹ ሀገራት የውሃ ፕሮጀክቶችን እንዳያከናውኑ ከፍተኛ መዋቅራዊ ማነቆ ፈጥረው ነበር።

በሌላ በኩል የዓለም ባንክ በፈረንጆቹ 2020 ባወጣው ‘Ethiopia Economic Update’ (No. ጥናቱ፣ የሕዳሴ ግድብ መጠናቀቅ ለአምራች ዘርፉ አስተማማኝ ኃይል በመስጠት የኢኮኖሚ ዕድገቱን የሚያፋጥን ትልቅ መፍትሔ ሆኗል።

ታዋቂው የታሪክ ተመራማሪ ባህሩ ዘውዴ (ፕ/ር) በ2002 ዓ.ም ባሳተሙት ‘A History of Modern Ethiopia’ መጽሐፍ፣ የዘመናዊቷ ኢትዮጵያ ትልቁ ድክመት አደጋዎችን የመቋቋም ሥነ-ልቦናዊ አቅም ማነስ መሆኑን አብራርተዋል። ግድቡ በሀገር ውስጥ አቅም መጠናቀቁ ይህንን ታሪካዊ ስብራት በማከም የብሔራዊ ማንሠራራት መባቻ ሆኗል።

አሁን … ያ ታሪክ ተቀይሯል። እነሆ የታላቁ የኢትዮጵያ ሕዳሴ ግድብ በስኬት ከተጠናቀቀ አንድ ዓመት አልፎታል፡፡ ይህ ታሪካዊ ስኬት የኢትዮጵያውያን የኩስመና ታሪክ ማክተሚያ፣ የማንሠራራት ታሪክ ጅማሮ ብሥራት ሆኗል።

የባርባዶስ ጠቅላይ ሚኒስትር ሚያ አሞር ሞትሊ፣ ታላቁ የኢትዮጵያ ሕዳሴ ግድብ ‘’የአፍሪካውያን የመቋቋም ጽናት፣ የአንድነት ታላቅ ምስክር፣ የታሪክ ድንቅ ክስተት፤ የኢንጂነሪንግ ዓድዋ» ብለውታል።

ኢትዮጵያ በራሷ አቅም አቅዳ መፈጸም እንደምትችል ለዓለም ያስመሰከረችበት ይህ ታሪካዊ ፍጻሜ፣ ለቀጣዩ ትውልድ የቆራጥነትና የሉዓላዊነት አርማ ሆኖ ይኖራል።

ጠቅላይ ሚኒስትር ዐቢይ አሕመድ (ዶ/ር)፣ በታላቁ የኢትዮጵያ ሕዳሴ ግድብ ግንባታ የምረቃ ሥነ ሥርዓት ላይ ባደረጉት ንግግር ‘‘…የታሪክ አቅጣጫችን ተቀይሯል፤ የፈተና እና የድህነት ዘመን አልፎ የብርሃን፣ የልማትና የብልጽግና አዲስ ምዕራፍ ተከፍቷል’’ በማለት ሰባቱን የጉባ ብሥራቶች ማብሠራቸውም የኢትዮጵያን የማንሰራራት ጉዞ ከፍታ የሚያረጋግጥ ነው።

ጠቅላይ ሚኒስትር ዐቢይ (ዶ/ር) የ2019 አዲስ ዓመትን አስመልክተው ባስተላለፉት የእንኳን አደረሳችሁ መልዕክት ÷ ቀጣዩ ዓመት የጉባ ብሥራቶችን የበለጠ ተግባራዊ የምናደርግበት ዘመን ይሆናል ሲሉ ገልጸዋል።

የፖለቲካ ምኅዳሩ ሰፍቶ የተለያዩ ዕሳቤዎችንና አካሄዶችን በብሔራዊ ጥቅም አስተሣሥረን የምንጓዝበት ዓመት እንደሚሆን አመልክተዋል፡፡

ሁለንተናዊ ሉዓላዊነታችን ይበልጥ የሚከበርበት፣ ኅብረ ብሔራዊ አንድነታችን ይበልጥ የሚጸናበት፣ በሁሉም ዘርፎች የጀመርነው ምርታማነት በዓይነትና በጥራት የሚጨምርበት፣ ሀገራችንም የቀጣናውና የአፍሪካ መሪነቷን ሥር መሠረት የምታስይዝበት፤ የኢትዮጵያ ብልጽግና ትውልድ ተሻጋሪ እንዲሆን ተደርጎ የሚገነባበት ዓመት ይሆናልም ነው ያሉት።

በአሰፋ አሕመድ