በምድርም በሰማይም የኢትዮጵያ ጋሻ

አዲስ አበባ፣ መስከረም 13፣ 2019 (ኤፍ ኤም ሲ) አንድ ሀገር ረጅም ዘመናትን ተሻግራ የምትጸናው በሉዓላዊነቷ ድንበር ላይ የማይበገር ጋሻና መከታ የሆነ ኃይል ሲኖራት ነው።

ታሪክ እንደሚነግረን ኢትዮጵያ የነጻነቷና የብሔራዊ ክብሯ ዋስትና ሆኖ የዘለቀው የአባቶቿና የእናቶቿ ታማኝ ተጋድሎ ነው።

ዛሬም ያ ጥንታዊ የሀገር ፍቅር ወግና ወታደራዊ ወኔ በዘመናዊ መልክ ተቀርጾ፣ በምድርም በሰማይም የሀገርን ዳርቻ የሚጠብቅ ጠንካራ መከታ ሆኖ ቀጥሏል።

ባለፉት ጥቂት ዓመታት የኢትዮጵያ መከላከያ ሠራዊት ያከናወናቸው ዘመናዊ የሪፎርም ሥራዎች ሠራዊቱን በሰው ኃይል ጥራት ብቻ ሳይሆን በላቀ የቴክኖሎጂ ቁመናም እንዲያብብ አድርገውታል።

የኢትዮጵያ አየር ኃይል እና የምድር ኃይል የተቀናጀ ዝግጁነት አዲስ ምዕራፍ ላይ ደርሷል። የሰማዩን አካል በዘመናዊ የራዳር ሥርአቶች እና ድሮኖች በመቃኘት፣ የምድር ሠራዊቱን ደግሞ በሰለጠኑ የኮማንዶ ክፍሎች በማጠናከር የሚሰጡ ፈጣን ሀገራዊ ምላሾች የሠራዊቱን ድንበር ተሻጋሪ ዝግጁነት በግልጽ ያሳያሉ።

ይህ የቴክኖሎጂ እና የሰው ኃይል ጥምረት ደግሞ ወታደራዊ ግዴታን ከመወጣት ባለፈ የዜጎችን ዕለታዊ ሰላም ለማረጋገጥ ሚናው ላቅ ያለ ነው።

ሠራዊቱ በተፈጥሮ አደጋዎች ጊዜ ደራሽ፣ በልማት ሥራዎች ጊዜ ደግሞ ደጋፊ በመሆን ከሕዝቡ ጋር ያለውን ጥብቅ ወንድማማችነት አስመስክሯል።

የብሔር፣ የሐይማኖትና የቋንቋ ልዩነቶችን ተሻግሮ ለሁሉም ኢትዮጵያውያን እኩል መከታ በመሆኑ የሀገራዊ አንድነታችን ሕያው ማህተም ተደርጎ ይወሰዳል።ይህ ተጋድሎና ታማኝነት በሀገር ወሰን ብቻ የተገደበ አይደለም።

የኢትዮጵያ ሠራዊት በአፍሪካ ህብረት እና በተባበሩት መንግሥታት ድርጅት የሰላም ማስከበር ተልዕኮዎች ያሳየው ጀግንነት፣ ሥነ-ምግባር እና ሕዝባዊ ወገንተኝነት በአህጉራዊና ዓለም አቀፋዊ መድረኮች ታሪክ የሚያወሳቸው ድሎችን አስመዝግቧል።

በላቀ ስልጠና፣ በዘመናዊ ቴክኖሎጂ እና በጽኑ ሀገራዊ ፍቅር የተገነባው ሠራዊት፣ የኢትዮጵያን ታሪካዊ ክብር ለማስጠበቅ እና የወደፊት ሰላሟን ለማረጋገጥ ዛሬም በምድርም በሰማይም አስተማማኝ ጋሻ ሆኖ ቆሟል።

በእመቤት ሲሳይ