የሕብረ ብሔራዊ ውበት እና ቱሪዝም ወር፡ መስከረም

አዲስ አበባ፣ መስከረም 14፣ 2019 (ኤፍ ኤም ሲ) በኢትዮጵያ የዘመን አቆጣጠር የመጀመሪያ የሆነው የመስከረም ወር የሀገሪቱን የባህል ሀብት ለዓለም የሚያስተዋውቁ ልዩ ልዩ የአደባባይ በዓላትና ሁነቶች የሚከወኑበት በመሆኑ የኢትዮጵያ ቱሪዝም ወር ተብሎ ይጠራል፡፡

በዚህ የአዲስ ተስፋ እና የአዲስ ጅምር እድል ወቅት የሀገሪቱን ጥልቅ ማህበራዊና ባህላዊ መሠረት የሚያንጸባርቁ በርካታ ደማቅ በዓላት ሰዎችን በአንድነት ያሰባስባሉ፡፡

የተባበሩት መንግሥታት የትምህርት፣ የሳይንስና ባህል ድርጅት (ዩኔስኮ) በዓለም ቅርስነት የመዘገበው የመስቀል ደመራ በዓል በመላው የኢትዮጵያ ኦርቶዶክስ ክርስትና ሃይማኖት ተከታዮች ዘንድ በድምቀት የሚከበር በዓል ነው፡፡

ሃይማኖታዊ መሰረት ያለው በዓሉ በልዩ ልዩ ማህበራዊ መስተጋብሮች እንዲሁም ታሪካዊ ክዋኔዎች በደመቁ ሃይማኖታዊ እና ባህላዊ ስነ-ስርዓቶች የታጀበ በመሆኑ በመስከረም የዓለም አቀፍ ጎብኚዎች ወደ የኢትዮጵያ እንዲጎርፉ የሚያደርግ የሀገሪቱ ሀብት ነው፡፡

የመስቀል በዓልን ተከትሎ በሚመጣውና ከገዳ ሥርዓት መገለጫዎች አንዱ የሆነው የኦሮሞ ህዝብ ታላቅ የምስጋና በዓል ኢሬቻ በሚሊየን የሚቆጠሩ ታዳሚዎች ተሰብስበው ከጭጋግ ወደ ብራ ላሸጋገራቸው ፈጣሪ ምስጋና የሚያቀርቡበት በዓልም የበርካቶችን ቀልብ የሚስብ ሥነ ሥርዓት ነው፡፡

በሰላም ስላለፈው ክረምት ምስጋና ከማቅረብ በተጨማሪ ስለተያዘው ዓመት ሠላም ጤና እና ምርታማነት የሚጸለይበት፣ እርቅና አብሮነት የሚያጠናከሩበትም ነው ኢሬቻ።

እነዚህ በዓላት የውጭ ሀገር ጎብኚዎችን የሚስቡ ከመሆናቸውም በላይ፣ የሀገሪቱን እና ህዝቧን እንግዳ ተቀባይነት እንዲሁም ሕያው የባህል እሴቶች በተጨባጭ የሚያሳዩ ናቸው።

በዓላቱ ለቱሪዝም ዘርፍ ካላቸው ኢኮኖሚያዊ አስተዋጽኦ ባለፈ ማህበራዊ ትስስርን በማጠናከር ረገድ ከፍተኛ ሚና ይጫወታሉ።

ሰላምና እርቅን በመስበክ ሀገራዊ እሴቶችን የሚያጎሉት የአደባባይ በዓላቱ በሕብረተሰቡ መካከል ያለውን ሕብረ ብሔራዊ አንድነትና ወንድማማችነት ያጠናክራሉ።

የመደመር መንግሥት የአደባባይ በዓላትን ጨምሮ የሀገሪቱን ሀብቶችን በማልማት የቱሪዝም ዘርፉን የኢኮኖሚ ምሰሶ ለማድረግ የሚያስችል የፖሊሲ ማዕቀፍ ማሻሻያ በማድረግ ለሥራ ዕድል ፈጠራ እንዲሁም ለስኬታማ የገጽታ ግንባታ ትኩረት ሰጥቶ ወደ ስራ ገብቷል።

አዳዲስ የቱሪስት መድረሻዎች፣ ዘመናዊ ኢኮ-ሎጆች፣ የከተማ ፓርኮች እና መስተንግዶዎችን በማስፋፋት የቱሪዝም መሰረተ-ልማቶችን በማልማት የመንግሥት ስትራቴጂካዊ ኢንቨስትመንት ኢትዮጵያን በዓለም አቀፍ ደረጃ ተመራጭ የቱሪዝም መዳረሻ እያደረጋት ይገኛል።

ከቱሪዝም ማስፋፋት ጎን ለጎን የኢትዮጵያን ቁሳዊ እና ባህላዊ ሃብቶች ለረጅም ጊዜ የመጠበቅና የመንከባከብ ሥራዎች በትኩረት እያከናወኑ ይገኛሉ።

በዩኔስኮ በዓለም ቅርስነት የተመዘገቡትን እንደ የላሊበላ ውቅር አብያተ ክርስቲያናት፣ የጎንደር ፋሲል ግቢ፣ የአክሱም ሐውልቶች እና የሐረር ጁገል ታሪካዊ ግንብ ያሉ ቅርሶችን ጨምሮ፣ የቅርሶችን አመጣጥና ታሪካዊ ይዘት ሳይበላሽ ለትውልድ ለማስተላለፍ የታለሙ የቅርስ ጥበቃና እድሳት ሥራዎችም በመከናወን ላይ ናቸው።

በምሕረት ደምሴ