በትግራይ ክልል የትጥቅ ማስፈታትና ወደ ሰላማዊ ሕይወት የመመለስ ሂደት በድጋሚ ተጀመረ

በሂደቱ መቀጠል ከጦርነት ወጥተው ወደ ሰላማዊ ኑሮ መመለስ የሚፈልጉ ታጣቂዎች የቀረበላቸውን የሰላም ጥሪ ተቀብለው በመቐሌ በሚገኘው የትግራይ ፖሊስ ኮሚሽን የምዝገባ ማዕከል በመቅረብ እየተመዘገቡ መሆኑ ተገልጿል።

በምዝገባው ሂደት እየተሳተፉ ከሚገኙ ታጥቀው ሲንቀሳቀሱ የነበሩ ወጣቶች እንደገለጹት÷ በአካባቢያቸው ለሚገኙ የኢትዮጵያ መከላከያ ሠራዊት ክፍሎች መሣሪያዎቻቸውን ካስረከቡ በኋላ ወደ መቐለ በመምጣት ለምዝገባ ቀርበዋል።

የትጥቅ ማስፈታት፣ ከታጠቁ ኃይሎች የመውጣት እና ወደ ሰላማዊ ሕይወት መመለስ ሂደት እንደገና መጀመሩ በጦርነት ምክንያት በአስቸጋሪ ሁኔታ ውስጥ የሚገኙ ታጣቂዎች የተረጋጋ ማኅበራዊና ኢኮኖሚያዊ ሕይወት እንዲመሠርቱ አዲስ ዕድል የሚፈጥር መሆኑም ተገልጿል።

የብሔራዊ ተሃድሶ ኮሚሽን ኃላፊዎች በበኩላቸው÷ በተለይም በቀደመው ግጭት ምክንያት ለችግር የተጋለጡ የትግራይ ወጣቶች ተስፋ ሳይቆርጡ፣ ወደ ሰላማዊ ሕይወት ለመመለስ የሚያስችሏቸውን አማራጮች እንዲጠቀሙና የወደፊት ሕይወታቸውን እንደገና እንዲገነቡ ጥሪ ማቅረባቸው ይታወሳል።

የትጥቅ ማስፈታት፣ ከታጠቁ ኃይሎች የመውጣት እና ወደ ሰላማዊ ሕይወት መመለስ ሂደቱ ዋና ዓላማ ታጣቂዎች ከታጠቁ ኃይሎች በመውጣት ወደ መደበኛ ማኅበራዊ ኑሮ እንዲመለሱ፣ በሰላም ግንባታና በልማት ሥራዎች እንዲሳተፉ ማስቻል ነው።

ይህንን ዓላማ ለማሳካት የኢትዮጵያ መንግሥት፣ የተለያዩ ተቋማትና ዓለም አቀፍ አጋር ድርጅቶች ቅንጅትና ድጋፍ ወሳኝ እንደሆነ ተጠቁሟል።

በምዝገባው ወቅት ሃሳባቸውን የገለጹ ታጣቂዎች የትጥቅ ማስፈታት፣ ከታጠቁ ኃይሎች የመውጣት እና ወደ ሰላማዊ ሕይወት መመለስ ሂደቱ እንደገና መጀመር ከታጠቀ ኑሮ ወደ ሰላማዊ ሕይወት ለመሸጋገር አስፈላጊ እርምጃ መሆኑን ገልጸዋል።

በተያያዘም የብሔራዊ ተሃድሶ ኮሚሽን በመቐሌ በሚገኙት የትግራይ ፖሊስ ኮሚሽንና የሰሜን ዕዝ ማዕከል በመቅረብ እንዲመዘገቡ ለሚፈልጉ ታጣቂዎች ጥሪ ማቅረቡ ተገልጿል።