125 ሺህ የዓሳ ጫጩቶች ወደ መገጭ ግድብ ተጨመሩ

የአማራ ክልል እንስሳትና ዓሳ ሀብት ልማት ቢሮ ባለሙያ አቶ አበበ ፈንታሁን እንደገለጹት፤ ክልሉ ያለውን የዓሳ ሀብት ልማት ሰፊ አቅም ለማሳደግ እየሰራ ይገኛል፡፡

በዚህም ያለውን የውሃ አማራጭ በመጠቀም የዓሳ ምርታማነትን ለማሳደግ እየተሰራ መሆኑን ገልጸው፤ ወደ መገጭ ግድብ 125 ሺህ የዓሳ ጫጩቶችን የመልቀቅ ሥራ የዚሁ አካል መሆኑን ጠቅሰዋል።

በክልሉ ባለፈው በጀት ዓመት 43 ሺህ ቶን በላይ የዓሳ ምርት መገኘቱን አስታውሰዋል።

ዘንድሮ ምርታማነትን ከማሳደግ ባለፈ በዘርፉ የስራ ዕድል ለመፍጠር እንደሚሰራ ገልጸው፤ በዓሳ ሃብት ልማት ለ20 ሺህ ወጣቶች የስራ ዕድል ለመፍጠር ታቅዷል ብለዋል።

በክልሉ በሚገኙ 10 ሀይቆች፣ 40 ግድቦች እና 20 ወንዞች ላይ የዓሳ ሀብት ልማት እየተከናወነ እንደሚገኝም ማብራታቸውን የጎንደር ከተማ ኮሙኒኬሽን መረጃ አመላክቷል።