የደቡብ ክልል ምክር ቤት ከ616 ሚሊየን 843 ሺህ ብር በላይ ተጨማሪ በጀት አፀደቀ

በጉባኤው መክፈቻ የክልሉ ምክር ቤት አፈ ጉባኤ ወይዘሮ ሔለን ደበበ እንዳሉት በኢትዮጵያ የሚታዩ ግጭቶች እና የሕዝቦች መፈናቀልን በመዋጋት ረገድ ሁሉም ዜጋ ሊረባረብ ይገባል ሲሉ ጥሪ አቅርበዋል፡፡

በዝምድና መሥራት፣ በጥቅም መተሳሰር እና የሴራ ፖለቲካ በሕዝቦች አብሮነት ላይ ፈተና እየደቀኑ በመሆኑ ከወዲሁ ልንዋጋቸው ይገባል ያሉት ወይዘሮ ሔለን የውስጥ እና የውጭ ጠላቶችን ደባ በጋራ ሆነን መመከት አለብን ሲሉም ተናግረዋል።

ለዚህ ደግሞ ኅብረትን እና በጋራ መቆምን መለያችን ማድረግ እንደሚያስፈልግ ገልፀዋል፡፡

የክልሉ ምክር ቤት አባላት የቀጣዩ 6ኛው ሀገራዊ ምርጫ ፍትሐዊ፣ ተዓማኒ እና ዴሞክሲያዊ እንዲሆን የድርሻቸውን እንዲወጡም አሳስበዋል።

የክልሉ ምክር ቤት አባላት በህግ ማስከበር ዘመቻው ውድ ሕይወታቸውን ላጡ ወገኖች የአንድ ደቂቃ የኅሊና ጸሎት አድርገዋል፡፡

ከምክር ቤቱ አባላት የተለያዩ ጥያቄዎች ተነስተው ምላሽ የተሰጠ ሲሆን ከፀጥታ ጋር በተያያዘም በክልሉ ሁከትና ትርምስ ለመፍጠር የሚደረግ ጥረት እውን አይሆንም ሲሉ የደቡብ ክልል ምክትል ርዕሰ መስተዳድር አቶ እርስቱ ይርዳው ምላሽ ሰጥተዋል ።

መንግስት የሴሮኞችን እኩይ ተግባር ለማክሸፍ ከፍተኛ ጥረት እየተደረገ ቢገኝም ህዝቡ ይሔን ተገንዝቦ የሴሮኞችን ተግባር ከመንግሥት ጓን ቆሞ በበለጠ መስራት አለበት ብለዋል፡፡

ባለፋት ግዚያቶች የተከሰቱ ችግሮችን ለመፍታት በተሰራው ስራ ለውጥ ቢኖርም የተቀረፈ ባለመሆኑ በቀጣይም አመራሩ ከህዝቡ ጋር በመሆን መስራት ይጠበቅባቸዋል ብለዋል።

የፀጥታ ስራንም ሆነ ለሁለንተናዊ እንቅስቃሴዎች ሰላም መሠረታዊ ነገር ነው ያሉት አቶ እርስቱ ይርዳው ችግር በመፍጠር የተጠረጠሩ ግለሰቦች ተይዘው በህግ ተጠያቂ ለማድረግ እየተሰራ ይገኛል ሲሉ ተናግረዋል ።

ከሀገራዊ ምርጫ ጋር በተያያዘም አነስተኛ ቁጥር ያላቸውን አሳታፊ ማድረግ ስለሚያስፈልግ ለክልል ምክር ቤት አባላንትን ልዩ የምርጫ ክልሎችን በክልል ደረጃ ለመጨመር ታሳቢ ያደረገ ውይይት ተካሂዷል፡፡

በተጨማሪ በጀት ረቂቅ አዋጅ ላይ ከተወያየ በኋላ 616 ሚሊየን 843 ሺህ ብር ለክልል ማዕከል ተጨማሪ በጀት አጽድቋል።

ከአስፈጻሚ አካላት ሹመትን በተመለከተ የምክር ቤት አባላት የነበሩና ሹመታቸውን ለማፅደቅ በወቅቱ በነበረው ወቅታዊ ችግር ሰባት የቢሮ ሀላፊዎች በተሰጣቸው ውክልና ሲያገለግሉ የነበሩ በምክትል ርዕሰ መስተደድር ማዕረግ ሲሰሩ የቆዩ አመራሮች ሹመታቸው ፀድቋል ።

በተጨማሪም ለክልሉ ዋና ኦዲተር መስሪያ ቤት ዋና ኦዲተር በመሆን ወይዘሮ ፈዲላ አደም እንዲሁም አቶ አለሙ ሀቹላ ምክትል ዋና ኦዲተር አቶ አባይነህ ሃቹላ በመሆን እንዲሾሙ በክልሉ ምክትል ርዕሰ መስተዳድር በአቶ እርስቱ ይርዳው ቀርበው በምክር ቤቱ አባላት አስተያየት ከተሰጠ በኋላ ሹመታቸው መፅደቅ ችሏል ።

በብርሃኑ በጋሻው ተጨማሪ መረጃ ከክልሉ መንግስት ኮሙዩኒኬሽን