ቤት ምኽሪ ሚኒስትራት ኣብ ዘካየዶ ስሩዕ ኣኼባ ኣብ ዝተፈላለዩ ጉዳያት ብምዝታይ ውሳነ አሕሊፉ

ኣዲስ ኣበባ፣ 20 ሕዳር፣ 2018 (ኤፍ ኤም ሲ)ቤት ምኽሪ ሚኒስትራት ሎሚ መዓልቲ ኣብ ዘካየዶ መበል 50 ስሩዕ ኣኼባ ኣብ ዝተፈላለዩ ጉዳያት ብምዝታይ ውሳነ አሕሊፉ፡፡

እቲ ቤት ምኽሪ ኣብ ዘካየዶ ስሩዕ ኣኼባ ዘሕለፎም ውሳነታት ከምዝስዕቡ ምቕራቦም ቤት ፅሕፈት ቀዳማይ ሚኒስትር ኣፍሊጡ።

1. እቲ ቤት ምኽሪ ብቐዳምነት ዝተመያየጠ፤ ኣብ ስትራቴጂ ዲጂታል ኢትዮጵያ 2030 እንትኸውን ኣብቲ ስትራቴጂ ብሰፊሑ ብምዝታይ በቲ ቤት ምኽሪ ካብ ዝፀደቐሉ መዓልቲ ጀሚሩ ተግባራዊ ንኽግበር ብምሉእ ድምፂ ወሲኑ።

   2. ብምቕፃል ምስ ዓለም ለኻዊ ማሕበር ልምዓት ኣብ ዝተፈረሙ ኽልተ ስምምዕነታት ድጋፍ ፋይናንስ ዝዘተየ እቲ ቤት ምኽሪ እቶም ስምምዕነታት ልቓሕ ምስ ስትራቴጂ ምምሕዳር ልቓሕ ሃገርና ዝጠዓዓሙ ምዃኖም ብምርግጋፅ ናብ ቤት ምኽሪ ተወከልቲ ህዝቢ ንኽመሓላለፉ ወሲኑ።

   3. እቲ ቤት ምኽሪ በዓል መዚ ሓለዋ ከባቢን ብሄራዊ ቴኣትር ኢትዮጵያ ንዝህብዎም ዝተፈላለዩ ግልጋሎታት ዝኽፈሉ ክፍሊታት ግልጋሎት ንምውሳን ኣብ ዝቐረቡ ኽልተ ረቂቕ ደንብታት ብሰፊሑ ብምዝታይ ኣብ ነጋሪት ጋዜጣ ፌደራል ተሓቲሞም ካብ ዝወፅእሉ መዓልቲ ጀሚሩ ተግባራዊ ንኽግበሩ ብምሉእ ድምፂ ወሲኑ።

   4. ኣብ ኣርባዕተ ኽልቲኣዊ ስምምዕነታት ዝዘተየ እቲ ቤት ምኽሪ እቶም ስምምዕነታት እንተፀዲቖም ኢትዮጵያ ምስተን ሃገራት ውፅኢታዊ ኽልቲኣዊ ማዕቀፍ ሕጊ ምትሕብባር ምክልኻል ገበን ንምፍጣር ዘኽእላ ምዃኑ ብምግንዛብ እቶም ረቀቕቲ ኣዋጃት ናብ ቤት ምኽሪ ተወከልቲ ህዝቢ ንኽመሓላለፉ ብምሉእ ድምፂ ወሲኑ።

   5. ኻልእ እቲ ቤት ምኽሪ ዝተመያየጠሉ ኣጀንዳ ረቂቕ ደንቢ ኤሌክትሮኒክ ፌርማ እንትኸውን ብሰፊሑ ድሕሪ ምዝታይ ኣብ ነጋሪት ጋዜጣ ፌደራል ተሓቲሙ ካብ ዝወፅአሉ መዓልቲ ጀሚሩ ተግባራዊ ንኽግበር ብምሉእ ድምፂ ወሲኑ።

   6. ኣብ መወዳእታ ‘ውን ደንቢ ቑፅሪ 114/1997 ቤት ምኽሪ ሚኒስትራት ኢሚግሬሽን ንምምሕያሽ ኣብ ዝቐረበ ደንቢ ብሰፊሑ ዝዘተየ እቲ ቤት ምኽሪ ኣብ ነጋሪት ጋዜጣ ፌደራል ተሓቲሙ ካብ ዝወፅአሉ መዓልቲ ጀሚሩ ተግባራዊ ንኽግበር ብምሉእ ድምፂ ወሲኑ።

ስሉጥን እዋናዊን ሓበሬታ ንምርካብ፦

ብዩትዩብ www.youtube.com/@fmctigrigna

ፌስቡክ Www.facebook.com/tigrignafana

መርበብ ሓበሬታ www.fanamc.com/tigrigna

ቴሌግራም t.me/tigrignafana ይከታተሉና፡፡

ኩሉ ግዘ ምሳና ስለዝኾኑ ነመስግን!