ምውናን በሪ ባሕሪ ኢትዮጵያ ጥንኩር መሰረት ዘለዎ ሕቶ ህልውና እዩ

ኣዲስ ኣበባ፣ 6 መስከረም፣ 2019 (ኤፍ ኤም ሲ)ምውናን በሪ ባሕሪ ኢትዮጵያ ዘላቒ ዕቤት ኢኮኖሚ ንምፍጣር ዝሕግዝ ጥንኩር መሰረት ዘለዎ ሕቶ ህልውና እዩ ኢሎም ዋና ፈፃሚ ስራሕ ትራንስፖርትን ሎጂስቲክስን ባሕሪ ኢትዮጵያ ኢንጂነር ኣብዱልበር ሸምሱ።

እቶም ዋና ፈፃሚ ስራሕ ከምዝበሉዎ፤ ስእነት በሪ ባሕሪ ኢትዮጵያ በቢዓመቱ ብቢልዮናት ዝቑፀር ሸርፊ ወፃኢ ክትከፍል ብምግባር ኣብ ሓፈሻዊ ዕቤትን ምንቅስቓስን ኢኮኖሚ ልዑል ጉድኣት እናስዐበ ይርከብ።

እዚ ድማ ህዝቢን መንግስቲን ኢትዮጵያ ተፈጥሮኣዊ፣ መልክኣ ምድራዊ፣ ስትራቴጂካዊን ሕጋዊን በሪ ባሕሪ ኢትዮጵያ ንምምላስ ዘቕረቡዎ ሕቶ ምኽንያታዊነት ዘጉልህ ምዃኑ ገሊፆም።

ኢትዮጵያ ኣብ ሎጂስቲክስን ትራንስፖርትን ባሕሪ ንዓለም ለኸ ተወዳዳራይነት ዘጎልብት ጥንኩር ዓቕሚ ዝሃነፀት ሃገር ምዃና ብምፅራሕ፤ ብቑዓት ካፒቴናት መራኽብን ብዝደንፈዐ ውዳበ ዝካየዱ ተግባራት ዓቕሚ ኢትዮጵያ ዘርእዩ ምዃኖም ተዛሪቦም።

ምስኣን በሪ ባሕሪ ኢትዮጵያ ዘሕዝን ከምዝኾነን እዚ ድማ ኣብ ምንቅስቓስ ትራንስፖርትን ሎጂስቲክስን ባሕሪ ዓብዪ ፅዕንቶ ከም ዘለዎን ኣመልኪቶም።

በሪ ባሕሪ ዘይምህላው ንኢትዮጵያ ኣብ ክራይ ወደብ፣ ኣብ ምድንጓይ ምንቅስቓስ ኣታዊን ወፃኢን ኣቕሑት ከምኡውን ብቐጥታ ፅዕንቶ ብምፍጣር፣ ዕቤት ኢኮኖሚ እናዳኸመ ከምዝርከብ ምስ ግዜኢ ኣብ ዝነበሮም ፃሒት ኣብሪሆም።