ኢትዮጵያ ንልምዓት ሃፍቲ ሰብን ንምርግጋፅ ማዕርነት ደቂ ኣንስትዮን ትኹረት ሂባ ትሰርሕ ኣላ – ኣፈ ጉባኤ ኣሕመድ ሽዴ

ኣዲስ ኣበባ፣ 23 ጥቅምቲ፣ 2019 (ኤፍ ኤም ሲ)ኢትዮጵያ ኣብ ነዊሕ እዋን ትልሚ ልምዓታ ንልምዓት ሃፍቲ ሰብን ምርግጋፅ ማዕርነት ደቂ ኣንስትዮን ትኹረት ሂባ ትሰርሕ ኣላ ኢሎም ኣፈ ጉባኤ ባይቶ ወከልቲ ህዝቢ ኣይተ ኣሕመድ ሽዴ።

ኣብ ቁፅሪ ህዝቢን ልምዓትን፣ ጥዕናን መሰላትን ስነ-ተዋልዶ፣ ከምኡ እውን ፖሊሲ ማዕርነት ፆታ ዘድሀበ መድረኽ ዘተ ኣባላት ፓርላማ ኣፍሪካን እስያን ኣብ ኣዲስ ኣበባ ተኻይዱ።

ኣብቲ መድረኽ ዝተረኸቡ ኣፈ ጉባኤ ኣሕመድ ሽዴ፤ ኢትዮጵያ ክሳብ 2050 ዓ.ም.ፈ ኣብ ዝቕፅል ስትራተጂ “መደመር” ኣቢላ ምሉእ ሃገራዊ ዓቕማ፣ ህዝባ፣ ትካላታን ሃፍታን ብምውህሃድ ንሓባራዊ ሃገራዊ ዕላማ ብቆራፅነት ትሰርሕ ከምዘላ ተዛሪቦም።

ካብዚ ብተወሳኺ ኢትዮጵያ ኣብ ሃር በቆል ኣተሓሳስባታት ዝተመስረቱ መፍትሒታት ልምዓት ከምኡ እውን ብሓሳብ፣ ብስትራተጂን ተሓታትነትን ዝምራሕ ዘበናዊ ምምሕዳር ብውፅኢታዊነት ትትግብር ኣላ ኢሎም።

መንግስቲ መደመር ነዚ ዓብዪ ናይ ነዊሕ እዋን ራኢ ናብ ጭቡጥ ውፅኢት ንምልዋጥ ሓደሽቲ መፍትሒታት ብምፍጣር ቀረብ ኣገልግሎትን ልምዓትን ብምቅልጣፍ ዕዉታት ስራሕቲ ብምስፋሕን ብምድጋምን ከምኡ እውን ኣብ ኩሎም መዳያት ልምዓት ፅሬት ንምርግጋፅ ትኹረት ገይሩ ይሰርሕ ከምዘሎ ኣመልኪቶም።

እዞም መትከላት ኣብ ትምህርቲ፣ ጥዕና፣ ህንፀት መሰረተ ልምዓትን ካልኦትን ማሕበራዊን ኢኮኖሚያዊን ዘፈራት ብተመሳሳሊ ኩነታት ኣብ ተግባር እናወዓሉ ከምዝርከቡ እውን ኣመልኪቶም።