ሶፍ ዑመር… ዘደንቕ ምስጢራዊ በዓልቲ

ኣዲስ ኣበባ፣ 29 ሰነ፣ 2018 (ኤፍ.ኤም.ሲ)ኢትዮጵያ መበቆል ጥንታዊ ዘርኢ ወዲ ሰብ ዝኾነት፣ ብዙሓት ሰብ-ሰራሕን ተፈጥሮኣዊን፣ ዝድህሰሱን ዘይድህሰሱን ሓድጊታት ትውንን ሃገር እያ።

ቀደም ክብል ካብ ዓውዲ ቱሪዝም ብዙሕ ረብሓ ክትረክብ ልዑል ዕድል እኳ እንተነበራ፣ ነቲ ዓውዲ ዝተውሃበ ውሱን ትኹረት ምኽንያት ዘለዋ ዓቕሚን ዕድልን ብግቡእ ኣይተጠቐመትሉን።

ካብ ቀረባ እዋን ጀሚሩ ግን ቱሪዝም ናይ ኢትዮጵያ ዕብየትን ብልፅግናን ዋና መሰረት ኮይኑ፣ ብልዑል ትኹረት ካብ ዝስርሑ ዘለዉ ዓውዲታት ሓደ ኮይኑ ይርከብ።

ካብቶም ትኹረት ዝተገብረሎም ቀንዲ ጉዳያት ድማ፣ ዓቕሚ ቱሪዝም ዘለዎም መብፅሒታት ደረጃኦም ብዝሓለወ መልክዑ ክምዕብሉ ምግባር፣ መሰረተ ልምዓት ምምላእን፣ ዘላቒ ብዝኾነ መንገዲ ፅባቐኦም ምምሕያሽን ምግባር ኢዩ።

በዓልቲ ሶፍ ዑመር ካብ ርእሰ ከተማ ኣዲስ ኣበባ 532 ኪሎ ሜትር ርሒቑ፣ ኣብ ዞባ ምብራቕ ባሌ ዝርከብ ዘገርም ተፈጥሮኣዊ መስሕብ ቱሪዝም እዩ።

እቲ ቦታ ስሙ ዝረኸበ፣ ቅድሚ 1 ሺሕ ዓመት ኣብቲ በዓልቲ ዝነብሩን ኣብቲ ቦታ ሃይማኖታዊ ትምህርቲ ዝህቡን ዝነበሩ ሸኽ ሶፍ ዑመር ዝበሃሉ ኣቦን መሰረት ብምግባር ከምዝተሰየመ ይንገር።

ብውቁብ ተፈጥሮኣዊ ፀጋታት ዝተኸበበ እዚ መብፅሒ ቱሪዝም፣ 1 ሺሕን 385 ሜትሮ ልዕሊ ፀፍሒ ባሕሪ ዝርከብ እዩ።

ካብ ሓደ ጫፍ ናብ እቲ ካልእ ጫፍ በዓልቲ ብእግሪ ንምስጋር ካብ 2 ክሳብ 3 ሰዓት ይወስድ፣ እዚ ድማ ነቲ ቦታ ኣዚዩ ፍሉይን ዘገርምን ይገብሮ።

እዚ ዘደንቕ መብፅሒ ቱሪዝም ንምዕዛብ በቢዓመቱ ካብ ዝተፈላለዩ ክፍልታት ዓለም ብዙሓት ቱሪስታት ይመፅኡ። ይኹን እምበር እቲ ቦታ ብዝድለ ደረጃ መሰረተ ልምዓት ስለ ዘይተማልአሉ፣ ንዓውዲ ቱሪዝም ዘለዎ ዓቕሚ ምሉእ ብምሉእ ከይተጠቐመ ንነዊሕ ዘበናት ፀኒሑ እዩ።

ሕዚ ግን እዚ ፀገም ብዘላቒ መገዲ ንምፍታሕን በፃሕቲ ንፅቐ እቲ ቦታ ሙሉእ ብሙሉእ ክሕጎሱሉ ዕድል ንምፍጣርን ከምኡ እውን በዓልቲ ሶፍ ዑመር ከም ዓብዪ መብፅሒ ቱሪዝም ንሃገር ዝግባእ ረብሓ ንኽህብ ስራሕቲ ልምዓት ብስፍሓት ይግበረሉ ኣሎ።

ፍልፍል በጀት እቲ ፕሮጀክት ድማ ብቀዳማይ ሚኒስትር ኣቢይ ኣሕመድ (ዶ/ር) ዝተፅሓፈ መፅሓፈ “የመደመር ትውልድ“ ብመሸጣ ካብ ዝተረኸበ እቶት እዩ።

ኣብቲ ከባቢ ኣብ ህንፀት ዝርከብ ዲንሾ ሎጅ ከምኡ እውን ኣብ ምዝዛም ደረጃ ዝርከብ ሶፍ ዑመር ሎጅ ናይ ቱሪዝም ፕሮጀክታት፣ ነቲ ዓውዲ ልዑል ምንቕቓሕ እናፈጠሩ ይርከቡ።

እዚ ውቁብ በዓልቲ ብዝበለፀ ቀልቢ ንኽስሕብን ኣብ ዝተፈላለያ መራኸብቲ ሓፋሽ መዘራረቢ ንኽኸውንን ኣብዚ ዓመት ወርሒ ጥቅምቲ ቀዳማይ ሚኒስትር ኣቢይ ኣሕመድ (ዶ/ር)ን ካልኦት ኣመራርሓን ኣብ ዝተረኸቡሉ “ወግዒ ሶፍ ዑመር“ ብዝብል ርእሲ ዝተኻየደ ዘተ ተሳሊጡ ነይሩ።

እዚ ሓድሽ መልክዕ ኣብ መራኸቢ ሓፋሽ ምስተጋወሐ ናብቲ ቦታ ዝኸዱ ቁፅሪ በፃሕቲ ከም ዝወሰኸ ሓበሬታታት ኣመልኪቶም።

በዓልቲ ሶፍ ዑመር ተመራፂ መስሕብ ቱሪዝም ብምግባር፣ ኢትዮጵያ ኣብ ኣፍሪካን ኣብ ዓለምን ቀዳመይቲ መብፅሒት ቱሪዝም ንምግባር ዝተረኣየ ትግሃትን ውፅኢትን ንኻልኦት ተመሳሳሊ ፕሮጀክታት እውን ፅቡቕ ኣብነት ክኸውን ዝኽእል ኢዩ።

ብመልካም ፈቃዱ